Олтин нархи тарихда илк бор бир унция учун 4500 доллардан ошди, кумуш ва платина ҳам рекорд даражага кўтарилди. Бу ҳақда Reuters хабар берди.
24 декабрь куни спот олтин нархи 0,8 фоизга ошиб, бир унцияси учун 4 524 долларга қимматлаган. Шу тариқа, қимматбаҳо металл йил бошидан буён 72 фоизга ўсди. Кумуш нархи эса 1,2 фоизга кўтарилиб, унцияси 72,27 доллар билан рекорд қайд этди. Платина нархи эса 3,3 фоизга ошиб, унцияси 2 377,50 доллар билан тарихий энг юқори даражани қайд этди.
“Деглобализация шароитида, айниқса АҚШ ва Хитой ўртасидаги кескинлик сақланиб турган бир пайтда, суверен хатарлар билан боғлиқ бўлмаган, нейтрал воситачи вазифасини бажара оладиган активга эҳтиёж ортмоқда”, деди Таstylive компаниясининг глобал макро бўлими раҳбари Илья Спивак.
Олтин бу йил 70 фоиздан кўпроқ қимматлашди ва бу 1979-йилдан бери энг катта йиллик ўсиш бўлди. Нархларнинг кескин кўтарилишига хавфсиз активларга бўлган талаб, АҚШда фоиз ставкалари пасайтирилиши кутилаётгани, марказий банкларнинг фаол харидлари, доллардан узоқлашиш (де-долларизация) жараёнлари сабаб бўлди. Бозор иштирокчилари келаси йили икки марта ставка пасайтирилишини кутмоқда.
Кумуш йил давомида 150 фоиздан ортиқ қимматлашиб, кучли инвестицион талаб, АҚШнинг муҳим стратегик минераллар рўйхатига киритилгани ва импулсли харидлар фонида нархи олтиндан ҳам тезроқ ўсди.
