Россия нефти ортилган камида 20 та танкер Хитой ва Ҳиндистон портларига кириш учун рухсат кутмоқда, яна бошқа кемалар эса юкларни етказиб бериш учун ойлар давомида денгизда қолиб кетмоқда. Бу ҳақда Bloomberg хабар берди.
Россия ўз нефтига харидор топишда тобора кўпроқ қийинчиликка дуч келмоқда. АҚШ президенти Дональд Трамп август ойида Ҳиндистон Россия нефтини фаол сотиб олаётгани сабаб божларни икки баравар оширгач, танкерларда сақланаётган Россия нефти ҳажми қарийб 1,5 баравар кўпайди.
Таъкидланишича, нефть экспортидан тушадиган даромад Кремль бюджетини тўлдириш ва урушни давом эттириш учун муҳим манба бўлиб қолмоқда. Шу билан бирга, Россия нефтини ташиш ҳажми юқори даражада сақланмоқда. Жумладан, 21 декабргача бўлган тўрт ҳафта ичида у 2023 йил май ойидан бери максимал даражага етди. Жумладан, 14 декабргача бўлган даврга нисбатан 200 минг баррелга ошиб, кунига 3,87 миллион баррелни ташкил этди.
Экспорт ҳажмининг ўсиши қисман нефтни қайта ишлаш ҳажмининг камайиши билан изоҳланади. Украина томонидан Россия нефть инфратузилмасига берилган зарбалар сабаб қайта ишлаш даражаси мавсумий меъёрлардан пастлигича қолмоқда. Бироқ экспорт қилинаётган нефтнинг ҳаммаси ҳам харидорлар портларида туширилмаяпти.
Bloomberg агентлигига кўра, кўплаб танкерлар ойлар давомида денгизда туриб қолмоқда. Россия уларни сотиш учун Россия катта чегирмалар таклиф қилишга мажбур бўлмоқда. Ҳозирда камида 20 та танкер Россия нефти билан Хитой ва Ҳиндистон яқинида тўпланиб қолган. Натижада денгиздаги танкерлардаги нефть ҳажми август ойи охиридан бери 48 фоизга ошиб, 185 миллион баррелни ташкил этди.
Россия Хитойга арзон нархда нефть сотмоқда
Россия нефть компаниялари Ҳиндистон заводлари рад эта бошлаган партияларни сотиш учун Хитойга нефтни юқори чегирмаларда беришга мажбур бўлмоқда. Мисол учун, Болтиқбўйи портларида Уралс маркали нефтнинг айрим партиялари Brent маркасига нисбатан бир баррел учун 35 долларгача чегирма билан сотилмоқда. Бу уруш давридаги рекорд кўрсаткичдир.
Brentнинг ҳозирги нархларини инобатга олганда, бу Уралс нефтининг бир баррели 30 доллардан ҳам арзонлашганини англатади. Бу кўрсаткич пандемия давридан бери энг паст даража ҳисобланади. Уралс учун ўртача чегирмалар Болтиқ денгизида бир баррел учун 21,5 долларни, Қора денгизда эса, тахминан, 20 долларни ташкил этади. Россиянинг асосий экспорт нефти ўртача 40 доллар атрофида сотилмоқда. 2025 йил бошига нисбатан асосий экспорт маркаси эса 40 фоизга арзонлашган.
