АҚШ виза олиш жараёнида 15 минг долларгача виза учун гаров тўлаш талаб этиладиган давлатлар рўйхатини кенгайтирди. Бу ҳақда Associated Press хабар берди.
Ҳозирда рўйхатда 13 та мамлакат мавжуд бўлиб, уларнинг иккитасидан ташқари барчаси Африкада жойлашган. Янгиланган рўйхатга Бутан, Боцвана, Марказий Африка Республикаси, Гвинея, Гвинея-Бисау, Намибия ва Туркманистон киритилди. Бу қарор Трамп маъмуриятининг АҚШга кириш талабларини кучайтиришга қаратилган навбатдаги чораси ҳисобланади.
Эндиликда виза олишни истаган шахслар билан юзма-юз суҳбатлар ўтказилади, уларнинг ижтимоий тармоқлардаги фаолияти текширилади, шунингдек, ўзлари ва оила аъзоларининг аввалги сафарлари ҳамда турмуш шароитлари ҳақида батафсил маълумот тақдим этиш талаб қилинади.
АҚШ расмийлари 5 минг доллардан 15 минг долларгача бўлган виза учун гаров чораси мақсадли давлатлар фуқароларининг виза муддати тугагач, мамлакатда қолиб кетмаслигини олдини олишга қаратилганини билдирган. Гаров пули визанинг берилишини кафолатламайди, бироқ виза рад этилган тақдирда ёки ариза берувчи виза шартларига риоя қилганини исботласа, тўланган сумма қайтарилади. Виза гарови дастлаб Мавритания, Сан-Томе ва Принципи, Танзания, Гамбия, Малави ва Замбия фуқароларига нисбатан жорий этилганди.
