Грузияда Туркия ҳарбий самолёти ҳалокатга учраши ортидан мамлакат Мудофаа вазирлиги тергов тугагунига қадар С-130 ҳарбий самолётларининг парвозини тўхтатди. Бу ҳақда TRT Haber хабар берди.
Қайд этилишича, Мудофаа вазирлиги қутқарув операцияси якунланганини эълон қилган ва эҳтиёт чоралари кўрилганини билдирган.
“Бизнинг самолётларимизнинг учиши 12 ноябрдан бошлаб эҳтиёт чораси сифатида тўхтатилган. Барча техник текширувлар ва назоратлар ўтказилгандан сўнг ундан муваффақиятли ўтган самолётлар (С-130) парвози қайта бошланади”, дейилади Туркия Мудофаа вазирлиги баёнотида.
Маълумотларга кўра, ҳозирда барча ҳалок бўлганларнинг жасади топилган, самолётнинг қора қутиси аниқланиб, Туркия ҳукуматига топширилган. Энди самолётнинг кенг ҳудуд бўйлаб тарқалган барча қисмлари йиғилиб, Туркияга етказилади.
Мудофаа вазирлиги самолёт бортида ҳеч қандай қурол-яроғ бўлмаганини, ичида шахсий таркиб, шунингдек, самолётларни таъминлаш воситалари ва эҳтиёт қисмлари бўлганини маълум қилган.
Шунингдек, вазирлик самолёт эски бўлган деган маълумотларни рад этган – у Саудия Арабистонидан 2012 йилда сотиб олинган, 2014 йилда армияга қабул қилинган, модернизация қилинган ва 2022 йилда қайта хизматга киритилган.
