Кипр ва Британия расмийлари 2 март куни тунда Кипрдаги Британия авиабазасига дрон ҳужум қилганини маълум қилди. Мазкур ҳодиса Эрон атрофидаги можарога Европа Иттифоқи аъзосини ҳам билвосита жалб қилган ҳолда вазиятнинг кескинлашувига сабаб бўлди.
Зарба Британия Қироллик ҳарбий-ҳаво кучларининг Akrotiri базасидаги учиш-қўниш йўлагига берилган. Ҳужум оқибатида бино ва иншоотларга бир оз зарар етган, қурбонлар ва жароҳатланганлар йўқ. Бу 1986 йилдаги Ливия жангариларининг ракета ҳужумидан сўнг мазкур ҳарбий объектга қилинган биринчи ҳужумдир.
Кипр президенти Никос Христодулидиснинг сўзларига кўра, маҳаллий вақт билан тунги соат 00:03 да Shahed русумли дрон ҳарбий иншоотга бориб урилган. Эрон технологияси асосида ишлаб чиқилган ушбу қурилма айнан қаердан учирилгани ҳозирча номаълум.
“Кипр нишон эмас эди”
Британия сўнгги ҳафталарда Эрон бўйича кутилаётган операциялар муносабати билан Akrotiri’га қўшимча ҳаво кучларини жойлаштирган эди. Гарчи расмий Лондон базалардан фойдаланилмаслигини айтган бўлса-да, 1 март куни бош вазир Кир Стармер Британия АҚШнинг Эрон ракета омборлари ва учириш қурилмаларига қарши мудофаа зарбалари учун ўз базаларидан фойдаланиш сўровини қабул қилганини билдирди.
Аҳоли орасидаги ваҳима
Портлаш овози Ўрта Ер денгизидаги минглаб хорижий компаниялар жойлашган ва сайёҳлик маскани бўлган оролни ларзага келтирди. Кипр ороли Akrotiri қишлоғи аҳолиси тунда ўз уйларини ташлаб қочишга мажбур бўлган.
“Телевизор кўраётганимда кучли портлаш эшитилди. Полициядан нима бўлганини сўрадим, лекин улар ҳеч нарса дея олмаслигини билдирди. Шундан сўнг хотиним ва яқинларимни Лимасолга олиб кетдим”, дейди Теодорос исмли маҳаллий аҳоли вакили.
Стратегик аҳамиятга эга ҳудуд
Akrotiri базаси Лимасол шаҳри яқинида жойлашган бўлиб, у Британия 1960 йилда мустақиллик берганидан сўнг ўзида сақлаб қолган икки суверен ҳудуддан биридир. Майдони 99 квадрат мил (орол ҳудудининг қарийб 3 фоиз қисми).
База британиялик 7 000 ҳарбий хизматчи ва уларнинг оилаларини сиғдира олади. У илгари Ироқ, Сурия ва Ямандаги операцияларда фойдаланилган. Шунингдек, оролнинг шарқий қисмида Айиос Николаос разведка пункти жойлашган. Европа Иттифоқи расмийларининг фикрича, Эрон ушбу ҳаракатлари билан можарони кенгайтиришга ва европаликларни унга тортишга уринмоқда.
