Ўзбекистон миллий терма жамоаси ва “Пахтакор” клуби ҳужумчиси Игорь Сергеев фаолиятини Россия Пример-лигасида давом эттириши мумкин. 32 ёшли ҳужумчига “Крилья Советов” қизиқиш билдирмоқда. Бу ҳақда инсайдер Иван Карпов хабар берди.
Манбага кўра, Игорь Сергеевга Россия клуби ойига 2,5 миллион рубль маош, 1,5 миллион рубль кўринишида бонус пули ҳамда 2 йиллик шартнома таклиф қилган. Футболчи томони эса ойига 4 миллион рубль + 3 миллионлик имзо бонусини талаб қилмоқда. Бундай молиявий шартлар клубни қониқтирмаяпти, шу боис битим ҳозирча якунига етганича йўқ.
Сергеев фаолияти давомида Ўзбекистонда, Хитойда, БААда, Қозоғистонда ва Таиланд миллий чемпионатларида ўйнаган. Клуб даражасида 400 та ўйинда 192 та гол уришга муваффақ бўлган. Сергеев Ўзбекистон терма жамоаси сафида эса 81 та ўйинда 24 та голга муаллиф бўлган.
Маълумот учун, Игорь Сергеев жорий йил аввалида Тошкентнинг “Пахтакор” жамоаси сафига келиб қўшилган эди. Ҳужумчининг “шерлар” билан шартномаси 1 мавсумга мўлжалланган бўлиб, қишда якунига етади. Шу боис, “Крилья Советов” Сергеевни эркин агент сифатида қўшиб олишга жиддий ҳаракат қилмоқда.
