Қирғизистон депутати Умбетали Қидиралиев суғориш суви учун қўшни давлатлар пул тўламаслигидан норозилик билдирди. У бу ҳақда 9 февраль куни Жўқорғи Кенешнинг Аграр сиёсат, сув ресурслари, ер қаъридан фойдаланиш, экология ва атроф-муҳитни муҳофаза қилиш қўмитаси йиғилишида маʻлум қилди.
Депутат бутун дунёда иқлим ўзгараётгани, сув танқислиги кузатилаётганини таъкидлади.
“Шу билан бирга, гидроиншоотларимиздаги сув омборларидаги сувнинг қарийб 80 фоизи Қозоғистон ва Ўзбекистонга оқиб кетмоқда. Улар билан бу масалани қандай ҳал қиламиз?”, деб сўради Қидиралиев.
Сув ресурслари, қишлоқ хўжалиги ва қайта ишлаш саноати вазири Бакит Торобоев Қамбарота ГЭС-1 қурилишига ҳисса қўшаётган Ўзбекистон ва Қозоғистон айнан сувдан манфаатдор эканини очиқ айтишаётганини билдирди.
У Кампиробод сув омбори Ўзбекистон билан 50/50 тамойили асосида бошқарилишини эслатди. Киров ва Орто Токой сув омборлари Қирғизистон балансида бўлса-да, ҳар йили давлатлараро комиссиялар Қирғизистон қанча ҳажмда сув бериши мумкинлигини белгилаб беради.
“Демак, Қирғизистон бу гидроузелларни сақлашдан иқтисодий фойда кўрмаяптими? Таъмирлаш, сувни сақлаб туриш, дамбаларни ревизия қилиш керак. Хуллас, буларнинг бари харажат! Ҳатто АҚШ сув учун Канадага, Германия эса Швецияга пул тўлайди. Нега Қирғизистон ўз суви учун пул олмайди? Ахир бу халқаро ҳуқуқ-ку!”, деди Қидиралиев.
Энергетика вазири ўринбосари Насиббек Каримов бу борада энергетиклар билан ҳамкорликда иш олиб борилаётганини айтди. Торобоев бу ёпиқ маълумот бўлиб, Энергетика вазирлиги хизмат доирасида маълумотларни тақдим этишини билдирди.
“Аммо президент Садир Жапаров таъмирлаш учун қўшнилардан пул олмаслик ва талаб қилмаслик кераклигини айтган. Ўз кучимиз билан таъмирлаш ишларини олиб борамиз, деган. Улар ўзлари хоҳиш билдирган тақдирдагина, ёрдам бериши мумкин. Биз мажбурламаймиз”, деди Торобоев.
