Тошкент вилояти Чиноз туманида 9-синф қизга шилқимлик қилган 51 ёшли эркак уч суткага қамалди.
Суд материалларига кўра, 2025 йил 9 декабрь куни Чиноз туманида яшовчи 1975-йилда туғилган Н.Т. мактабдан уйига қайтаётган 9-синф қизнинг йўлини тўсиб, қўл телефонини созлаб беришини сўраган.
Шунингдек, қизнинг орқасидан эргашиб, бир неча маротаба қаерда яшашини, кимнинг қизи ва исми нима эканлигини, келин қилишини айтган. Бундан ташқари, чиройли қиз эканлигини билдириб, юзидан битта ўпиб қўйишни сўраб, шилқимлик қилган.
Жабрланувчи ушбу ҳолатдан қўрқиб, уйига кирган ва бўлган воқеани онасига айтган. Шундан сўнг ота-онаси ҳуқуқни муҳофаза қилувчи органларга мурожаат қилган.
Суд мажлисида Н.Т. айбини тан олиб, маст бўлгани сабабли ўзини бошқара олмасдан шу ишни қилганини билдирган.
9 февраль куни Жиноят ишлари бўйича Чиноз туман суди Н.Т.ни Маъмурий жавобгарлик тўғрисидаги кодекснинг 41-1-моддаси 1-қисми билан айбдор деб топган ҳамда унга нисбатан 3 сутка маъмурий қамоқ жазоси тайинлаган.
