Эрон Россия билан 500 миллион евролик қурол етказиб бериш бўйича махфий келишув тузган. Бу ҳақда “Financial Times” нашри хабар берди.
Нашр қўлига тушган ҳужжат ва манбаларга кўра, келишув 2025 йилнинг декабрь ойида Москвада имзоланган, етказиб беришлар эса 2027–2029 йилларга мўлжалланган. Айрим тизимлар аллақачон Эронга топширилган бўлиши мумкин. Гап 500 дона “ПЗРК Верба” кўчма зенит-ракета мажмуаси ва уларга мўлжалланган 2,5 мингта ракета ҳақида бормоқда. Бир дона ракета нархи 170 минг евро, учиш қурилмаси эса 40 минг евро деб баҳоланган. Шартномага, шунингдек, 500 дона “Маули-2” тунги кўриш мосламаси ҳам киритилган.
Нашр маълумотига кўра, битим “Рособоронэкспорт” ва Эрон Мудофаа вазирлигининг Москвадаги ваколатхонаси ўртасида тузилган. Компания изоҳ сўровига жавоб бермаган, Кремль ҳам масалага изоҳ беришдан бош тортган. Нашр ёзишича, келишувни ваколатхона ходими Руҳулло Катеби мувофиқлаштирган. АҚШ уни 2024 йилда санкциялар рўйхатига киритиб, “Россия ҳукумати билан алоқа қилувчи шахс” деб атаган.
Эроннинг Москвадаги элчиси Козим Жалолий илгари Эрон телевидениесига берган интервьюсида Россиядан амалга оширилган бир нечта рейсларда ҳарбий юклар бўлганини айтган. У сўнгги йилларда икки давлат ўртасида муҳим ҳарбий келишувлар тузилаётганини, етказиб беришлар эса ушбу битимлар бажарилаётганини кўрсатаётганини таъкидлаган, бироқ тафсилотларни очиқламаган.
Нашрнинг ёзишича, Россиянинг Ил-76ТД транспорт самолёти сўнгги саккиз кун ичида камида уч марта Минеральние Води шаҳридан Эроннинг Караж шаҳрига парвоз қилган, яна бир рейс декабрь охирида амалга оширилган. Шунингдек, январь ойида Эрон Россиядан олтитагача Ми-28 вертолётини олгани, улардан бири шу ой Теҳронда қўллангани айтилмоқда.
Аввалроқ, Эрон Президенти Масьуд Пезешкиён Россия раҳбари Владимир Путин билан музокаралар чоғида эришилган келишувлар икки давлат ҳамкорлиги учун янги уфқлар очишини билдирган. Унинг сўзларига кўра, Теҳрон бир йил аввал имзоланган 20 йиллик кенг қамровли стратегик шериклик шартномасини тез ва аниқ амалга оширишга қатъий бел боғлаган.
47 моддадан иборат ҳужжатнинг қарийб учдан бир қисми ҳарбий-техник ҳамкорлик ва халқаро хавфсизликка бағишланган. Унда томонлардан бирига ҳужум қилинган тақдирда, иккинчи томон тажовузкорга ҳарбий ёки бошқа ёрдам кўрсатмаслиги ва низони тартибга солишга кўмаклашиши белгиланган.
