Жазоир 10 сентябрь куни тўсатдан Бирлашган Араб Амирликлари билан дипломатик алоқаларни узганини эълон қилди. Мамлакат бунга Абу Даби томонидан амалга оширилган бир қатор “провокацион ва душманона” ҳаракатларни сабаб қилиб кўрсатди. Бироқ қарорнинг аниқ ва муайян сабаби очиқланмади.
Жазоир баёнотидан кўп ўтмай, БАА президентининг дипломатик маслаҳатчиси Анвар Гаргаш X ижтимоий тармоғида ҳолатга муносабат билдирди. У дипломатик алоқалар топишмоқлар ва ечиш қийин ишораларга эмас, балки ақл-идрок, мулоқот ва манфаатлар аниқлигига асосланиши кераклигини ёзди.
Сўнгги йилларда икки мамлакат ўртасидаги муносабатлар ёмонлашиб бораётган эди. Жазоир ОАВ БААни минтақада низолар келтириб чиқаришда айблаб, кескин танқид қилиб келаётган эди.
Жазоир Ташқи ишлар вазирлиги БААнинг ҳаракатлари тоқат қилиб бўлмайдиган даражага етганини билдирди. Вазирлик икки томонлама муносабатларни сақлаб қолиш учун барча чоралар кўрилгани ва улар тугаганини таъкидлади.
Анвар Гаргаш ўз хабарида Жазоир номини тилга олмади ва фикрларини ушбу қарор билан бевосита боғламади. У муваффақиятли дипломатия аниқ позиция ва келишмовчиликларни тўғри бошқаришга боғлиқ эканини айтди. Маълум бўлишича, Жазоир ТИВ БАА элчисини вазирликка чақирган. Унга тегишли қарор маълум қилинган ва мамлакатни тарк этиш учун 48 соат вақт берилган.
Жазоир ва БАА бир қатор минтақавий масалаларда ҳар хил позицияда туради. Жазоир Исроил билан муносабатларни меъёрлаштиришга қарши чиқади. БАА ва Жазоирнинг минтақавий рақиби бўлган Марокаш эса 2020-йилда АҚШ воситачилигидаги “Иброҳим келишувлари” доирасида Исроил билан дипломатик алоқалар ўрнатган эди.
Шунингдек, Икки мамлакат Ғарбий Саҳройи Кабир бўйича кўп йиллик низода қарама-қарши томонларни қўллайди. БАА бу ҳудудда консуллик очган ва Марокашнинг суверенитет талабини қўллаб-қувватлайди. Жазоир эса мустақиллик учун курашаётган Полисарио фронтига хайрихоҳлик билдиради.
Мамлакатлар манфаатлари Саҳал минтақасида ҳам тўқнашмоқда. БАА сўнгги йилларда у ердаги бир нечта ҳукуматлар билан алоқаларни кенгайтирди. Жазоирнинг эса ҳарбий тўнтаришлардан сўнг жанубий қўшнилари билан муносабатлари ёмонлашган.
Жазоир президенти Абдулмаджид Теббун 2025 йилда барча Форс кўрфази давлатлари билан муносабатлар аъло даражада эканини, фақат битта мамлакат бундан мустасно эканини айтган эди. У бу билан БААга ишора қилган.
Президент Саудия Арабистони, Кувайт, Уммон ва Қатарни биродар мамлакатлар деб атаган. Номини ошкор қилмаган мамлакатни эса Жазоирнинг ички ишларига аралашишда ва уни беқарорлаштиришга уринишда айблаган эди. 2026 йилнинг февраль ойида Жазоир 2013 йил май ойида Абу Дабида имзоланган БАА билан ҳаво қатнови тўғрисидаги битимни бекор қилиш жараёнини бошлаган эди.
