Яқинлашиб келаётган Жаҳон чемпионати ва унга тайёргарлик кўриш мақсадида Ўзбекистон Суперлигаси катта танаффусга чиқди. Эндиликда мавсум жорий йил 20 июлдан давом эттирилади.
Ўзбекистон профессионал футбол лигасининг 2026 йилги регламентига биноан Суперлига мавсуми кеча, 4 май санасида танаффусга чиқди. Эндиликда эртага, 6 май кунидан терма жамоа маҳаллий футболчилар иштирокида йиғинга киришади ва 10, 17, 24 май кунлари Суперлиганинг етакчи клубларига қарши учрашувларда иштирок этади.
Шунингдек, май, июнь, июль ойлари давомида катта танаффус юзага келаётгани сабаб май ойининг қолган қисмида Ўзбекистон кубоги учрашувлари ўтказилиши режалаштирилган.
Суперлиганинг иккинчи қисми Жаҳон чемпионатидан кейин – 20 июлдан бошланади. Суперлиганинг сўнгги тури жорий йилнинг 3 декабрь санасига тўғри келади. Ўтиш ўйинлари ва Ўзбекистон кубогининг ярим финалида иштирок этмайдиган клублар шу санадан кейин танаффусга чиқади. Ўтиш ўйинидан жой олган жами тўрт учрашув қисқа вақт ичида ташкил этилиши мақсадида марказлаштирилган ҳолда Тошкент шаҳрида ўтказилади.
Маълумот учун, айни дамда Суперлига турнир жадвалида Фарғонанинг “Нефтчи” жамоаси 28 очко билан етакчиликни сақлаб турибди. Кейинги ўринда эса 26 очко билан пойтахтнинг “Пахтакор” жамоаси бораётган бўлса, кучли учликни 20 очко билан “Бухоро” эгаллаб турибди.
