Россиянинг Санкт-Петербург шаҳрида энергетик ичимликларга муккасидан кетган 22 ёшли йигитнинг оёғи ишламай қолди. Бу ҳақда “Gazeta.ru” хабар берди.
Маълум қилинишича, компьютер ўйинларига қизиқиб қолган йигит ҳушёрлигини сақлаш учун энергетик ичимликлар ичишни бошлаган. Аввалига кунига бир банкадан истеъмол қилган, кейинчалик эса оч қоринга 3–5 тагача ичадиган бўлган.
Шундан сўнг Артёмнинг қорнида тўсатдан кучли оғриқ пайдо бўлган, кўнгли айниб, қайт қила бошлаган. Йигит панкреатит ташхиси билан касалхонага ётқизилган. Бироқ шифохонадан чиққач, касаллик яна қайталанган ва ошқозон ости безида киста пайдо бўлгани сабабли аҳволи оғирлашган.
Учинчи бор касалхонага ётқизилганда эса вазият янада жиддийлашган: Артёмда ошқозон ости безининг йирингли некрози ривожланган, оёқлари ишламай қолган, сурункали касалликлари кучайган, танаси заҳарланган, хотираси заифлашган ва анорекция (иштаҳа йўқолиши) кузатилган.
Ҳозирда йигит Санкт-Петербургдаги шифохоналардан бирида реабилитация олмоқда ва қайта юришни ўрганмоқда.
- Огоҳлантириш
Мутахассислар энергетик ичимликларни ҳаддан ташқари истеъмол қилиш, айниқса оч қоринга, ошқозон ости бези, юрак ва қон томирлари учун жиддий оқибатларга олиб келиши, шунингдек, қайтариб бўлмайдиган асоратларга сабаб бўлиши мумкинлигини огоҳлантиради.
“Ярим литр энергетик ичимликда 60 граммгача шакар бўлиши мумкин. Бу Жаҳон соғлиқни сақлаш ташкилоти (ЖССТ) тавсия қилган меъёрлардан анча кўп: катталар учун кунлик шакар истеъмолини 25 грамм билан чеклаш мақсадга мувофиқ. Акс ҳолда, ортиқча вазн, қандли диабет ва панкреатит ривожланиш хавфи ортади.
Бундан ташқари, энергетик ичимликларда кўп миқдорда сунъий қўшимчалар бўлади. Улар овқат ҳазм қилиш тизимида турли муаммоларни келтириб чиқариши мумкин: жиғилдон қайнаши, диарея, кўнгил айниши. Баъзи одамларда эса бу ичимликлар аллергик реакция ёки кўтара олмасликни келтириб чиқаради”, дея огоҳлантиради гастроэнтеролог Екатерина Кашух.
