Хоразмда экспертиза ҳужжатларини сохталаштириб бериш учун фуқародан пул талаб қилган ИИО ходими қўлга тушди. Бу ҳақда Ички ишлар вазирлиги хабар қилди.
Қайд этилишича, фуқаро таниши билан ўзаро низоли ҳолатлар юзасидан мурожаат қилиб, ҳамкорликда очилган хусусий корхонага оид ҳужжатлардаги имзолар шериги томонидан сохталаштирилган ҳолда даромадларни ўзлаштириб келаётганлигини билдирган.
Мазкур ҳолатлар юзасидан профилактика инспектори танишлари орқали экспертиза натижаларини унинг фойдасига ҳал қилиб беришини айтиб, эвазига 1000 доллар миқдоридаги пулни талаб қилиб, Хива шаҳри ҳудудида олган вақтида далилий ашёлар билан ушланди.
Ҳолат юзасидан Жиноят кодексининг 25-моддаси орқали 168-моддаси 3-қисми В банди ҳамда 28-модда орқали 211-модданинг 1-қисми билан жиноят иши қўзғатилиб, ходимга нисбатан қамоқ эҳтиёт чораси қўлланилди.
