Қозоғистон ҳукумати ва OpenAI компанияси сунъий интеллект технологияларини қўллаган ҳолда таълим соҳасида ҳамкорлик тўғрисида меморандум имзолади. Бу ҳақда Қозоғистон Республикаси Сунъий интеллект ва рақамли ривожланиш вазирлиги хабар бермоқда.
Меморандумни имзолаш Вашингтонда OpenAI вакиллари ва Қозоғистон расмий шахслари ўртасидаги учрашувда амалга оширилди. Қозоғистон Республикаси Сунъий интеллект ва рақамли ривожланиш вазирлиги ушбу келишув рақамлаштириш ва инновацион таълим ечимларини жорий этиш соҳасида узоқ муддатли ҳамкорлик учун асос яратишини таъкидлаган.
Ҳужжат қозоғистонлик педагогларга уч йил давомида ҳар йили камида 165 минг ChatGPT Edu лицензиясини беришни назарда тутади. ChatGPT’нинг махсус версияси таълим муассасаларида фойдаланиш учун мўлжалланган бўлиб, сунъий интеллектга асосланган воситалар ёрдамида ўқитиш сифатини оширишга қаратилган.
“Бутун дунё бўйлаб ўқитувчилар аллақачон маъмурий вазифаларни камайтириш ва ўқувчиларни ўқитиш ҳамда ривожлантиришга кўпроқ вақт ажратиш учун сунъий интеллектдан фойдаланмоқдалар. Тўғри қўллаб-қувватлаш билан ўқитувчилар ушбу воситалар билан ишлаш тажрибасини ривожлантириб, сунъий интеллектни ўқув жараёнида энг самарали тарзда қўллаш имкониятига эга бўладилар. Қозоғистон ҳукумати билан келишувимиз маҳаллий ўқитувчиларга ChatGPT’дан фойдаланишга ва бутун мамлакат бўйлаб мактабларга сунъий интеллект афзалликларини жорий этишга ёрдам беради”, дейди OpenAI GТМ таълим ва давлат дастурлари йўналиши раҳбари Кевин Миллс.
