Бельгия ҳарбий разведкаси ( SGRS ) веб-сайти киберҳужумга учради. Бу ҳақда Белга агентлиги xабар бермоқда.
Бельгия ҳарбий разведкаси вакилининг айтишича, SGRS сайти 6 ноябрь куни қисқа вақт давомида ишламаган, аммо ҳозирда тўлиқ фаолият юритмоқда.
“Биз SGRS веб-сайтига қарши эҳтимол DDoS-ҳужум бўлганлигини тасдиқлашимиз мумкин… Ҳеч қандай махфий маълумот олинганига ёки маълумотлар ошкор этилганига доир белгилар йўқ. Веб-сайт қисқа вақт давомида ишламади. Аммо, ҳозирда у тўлиқ ишга туширилган ва фаолият кўрсатмоқда”,
— деди Бельгия ҳарбий разведкасининг номи ошкор этилмаган вакили.
Агентлик маълумотларига кўра, NoName057 гуруҳидаги ҳакерлар ушбу киберҳужум учун масъулиятни ўз зиммаларига олишган. Белга киберҳужумни Бельгия Мудофаа вазири Тео Франкеннинг Москвага қарши таҳдидлари билан боғламоқда.
Октябрь ойи охирида Россиялик хакерлар Британиянинг саккизта ҳарбий базаси билан боғлиқ ички ҳужжатларни, жумладан, ходимларнинг шахсий маълумотлари ва киберхавфсизлик бўйича хизмат кўрсатмаларини тармоқларга сиздирганди.
Октябрь ойи бошида Шимолий кореялик хакерлар 2025 йил давомида 2 миллиард долларга тенг криптоактив ўғирлади. Бу рақам тарихдаги энг катта кибержиноят сифатида қайд этилмоқда.
Август ойида АҚШ федерал судларига ҳужжатларни топширишнинг электрон тизими кенг кўламли киберҳужумга учраганди.
