Бангладеш ҳудудидан муҳожирлар билан бирга сузиб чиққан кема Андаман денгизида чўкиб кетди. Воқеа оқибатида 250 дан ортиқ муҳожирлари бедарак йўқолган. Бу ҳақда БМТнинг қочқинлар ва миграция бўйича агентлиги хабар берди.
Қайд этилишича, қайиқнинг аниқ қачон чўккани ҳали аниқланмаган. Фалокат кучли бўрон ва денгиз тўлқинлари туфайли содир бўлган. Маҳаллий қирғоқ қўриқлаш хизматининг хабар беришича, қайиқ Бангладешдан Малайзия ҳудудига ноқонуний равишда кирмоқчи бўлган.
Қутқарувчилар жорий йилнинг 9 апрель куни Бангладеш байроғи остидаги кема қолдиқлари ва барабанларга ёпишиб олган 9 нафар мигрантни қутқариб қолган. Қочқинлар таҳминан 2 кун давомида очиқ денгизда жон сақлаган. Омон қолганларнинг айтишича, кемада 250 дан ортиқ одам бўлган. Уларнинг тақдири ҳали ҳам номаълумлигича қолмоқда.
“Бангладешдан Малайзия қирғоқларига йўл олган бенгал муҳожирлар кемаси кучли денгиз бўрони оқибатида чўкиб кетди. Биз фожиадан омон қолган 9 нафар муҳожирдан маълумот олишга уриняпмиз. Улар топилган ҳудудда қидирув-қутқарув ишлари давом этмоқда”, дейилади БМТнинг қочқинлар ва миграция бўйича агентлиги баёнотида.
Омон қолганлардан бирининг айтишича уларга Малайзиядан иш ва бошпана топиб бериш ваъда қилинган. Агентликка кўра, бу каби қайиқлар кўпинча кичик, тор ва тиқилинч бўлиб, тоза сув ва санитария каби асосий қулайликларга эга эмас. Қайиқдаги ўта огир шароит ва қўриқлаш хизматларининг таьқиби сабабли бу каби сафарлар кўпинча фожиа билан якунланади. Баъзи одамлар денгиздаги оғир муҳитдан ҳалок бўлиши, яна баъзилари эса маҳаллий хавфсизлик хизмати ходимлари томонидан ҳибсга олиниши ёки депортация қилиниши мумкин.
