Колумбияда бортида 15 киши бўлган Beechcraft 1900 русумли йўловчи самолёти ҳалокатга учради. Ҳодиса оқибатида бортдаги барча йўловчи ва экипаж аъзолари ҳалок бўлган. Бу ҳақда BBC хабар берди.
Самолёт давлатга қарашли Satena авиакомпаниясига тегишли бўлган. Йўловчилар орасида Колумбия Конгресси Вакиллар палатаси депутати Диоген Кинтеро ҳамда депутатликка номзод Карлос Салседо бўлган.
HK4709 борт рақамига эга самолёт билан охирги алоқа Колумбияда маҳаллий вақт билан 11:54 да (Тошкент вақти билан 21:54) ўрнатилган. Бу у Кукута шаҳридан парвоз қилганидан 12 дақиқа ўтиб содир бўлган.
Самолёт Камило Даса аэропортидан учиб чиқиб, тахминан 12:05 да (Тошкент вақти билан 22:05) Оканиа муниципалитетидаги Агуас Кларас аэропортига қўниши режалаштирилган эди. Сўнгги бор самолёт координаталари Плая-де-Белен ва Хакари муниципалитетлари орасидаги тоғли ҳудуд устида қайд этилган.
Кейинчалик Satena авиакомпанияси самолётнинг ёнилғиси тугаганини, шунингдек, фавқулодда радио маёғи ишга тушмаганини маълум қилган.
Қулаб тушган самолётни маҳаллий аҳоли аниқлаган. Ҳозирда ҳодиса сабаблари ўрганилмоқда. Бортда 13 нафар йўловчи ва икки нафар экипаж аъзоси бўлган. Ҳалок бўлганларнинг яқинлари учун махсус ишонч телефони ташкил этилган.
