Франция Президенти Эммануэль Макрон Қўшма Штатларга қарши туриш учун жавоб чораларини ишга солишни талаб қилди. Бу ҳақда Президентга таяниб, “Le Monde” газетаси хабар берди.
Макроннинг айтишича, Европа Иттифоқи АҚШниг божлар жорий этиш таҳдидига ўзининг кучли қаршилигини кўрсатиши керак.
Таъкидланишича, гап АҚШ Президенти Дональд Трамп томонидан эълон қилинган бож чораларига жавобан жорий этиладиган санкциялар ва қарши чоралар ҳақида бормоқда. Нашр шунингдек, Париж томонидан энг кескин чора сифатида АҚШга қарши тўғридан-тўғри санкциялар ҳам кўриб чиқилиши мумкинлигини қайд этган.
“Бу ҳозирги вазиятга жуда мос келадиган восита ва биз, албатта, уни қўллашдан тортинмаслигимиз, зарурат туғилганда эса уни амалда ишга солишимиз керак”, деган Миллий ассамблея президенти Яэль Браун-Пиве.
17 январь куни Трамп Данияни қўллаб-қувватлаётган Европа давлатларига нисбатан 10 фоизлик божлар жорий этилишини эълон қилган эди. Бу баёнот АҚШнинг Гренландияни аннекция қилиши мумкинлиги ҳақидаги гаплар фонида янграган. Америка Президентининг сўзларига кўра, июнь ойида бож ставкалари 25 фоизгача оширилади ва бу чоралар АҚШнинг оролни сотиб олиш бўйича келишувига эришилгунга қадар сақланиб қолади.
Эслатиб ўтамиз, аввалроқ Европа Иттифоқи мамлакатлари Президент Дональд Трампнинг Гренландияни қўллаб-қувватловчи мамлакатларга нисбатан божлар жорий этиш таҳдидлари туфайли АҚШдан 93 миллиард евро (108 миллиард доллар) миқдоридаги товарларга божлар ёки Америка компаниялари учун бир қатор чекловлар жорий этишни кўриб чиқаётгани ҳақида хабар берилганди.
