Россиялик стример ижтимоий тармоқлардаги провокацион баёнотлари учун Қозоғистондан чиқариб юборилди. Бу ҳақда Остона Политися департаментига таяниб, “РИА Новости” хабар берди.
“Чет эл фуқароси Г.К. Қозоғистонни тарк этди. Аввалроқ суд уни ижтимоий тармоқлардаги провокацион ва номақбул баёнотлари учун маъмурий жавобгарликка тортганди”, дейилади хабарда.
Шунингдек, аёлга беш йил давомида Қозоғистонга кириш тақиқланди.
Маҳаллий ОАВ маълумотига кўра, гап “Фасооллка” тахаллуси билан танилган Ксения Гузаева ҳақида бормоқда. У ижтимоий тармоқлардаги, хусусан, Twitch платформасидаги жонли эфирларда Павлодарнинг Қозоғистонга тегишли эканини шубҳа остига олган ва маҳаллий аҳолини ҳақорат қилган.
“Мени ‘штрафостан’ ва ‘лагостан’ ҳақидаги ҳазилим учун жазолашди. Натижада 85 минг тенге (тахминан 15 минг рубль) жаримага тортилдим. Депортация қилишаётганини аэропортда, рўйхатдан ўтиш жойида билдим. Мени ҳеч қандай суд қилишмади, шунчаки депортация қилишди”, дея вазиятга изоҳ берди стример.
Қозоғистон полицияси қонун ва мамлакатга ҳурмат истисносиз барча учун мажбурий эканини эслатиб ўтди. Идора, шунингдек, полиция ходимлари аёлни самолётга кузатиб қўяётгани акс этган видеони эълон қилди.
