Россияда бутун мамлакат бўйлаб қишда кучли совуқ ва кучли қор ёғиши кутилмоқда. Бу ҳақда “Новости mail” хабар бермоқда.
Синоптикларнинг огоҳлантиришича, келаётган қиш 250 йилдаги энг совуғи бўлиши мумкин. Марказий ва Волгабўйи ҳудудларида ҳаво ҳарорати Цельсий бўйича -35 даражагача пасайиб, қор ёғиши 400 миллиметрга, шамол эса сониясига 22 метргача кучайиши мумкин.
Уралсда ҳаво ҳарорати минус 40 даражагача пасайиб, қор бўронлари ва 350 миллиметргача ёғингарчилик бўлиши кутилмоқда. Красноярск ўлкаси ва Новосибирск вилоятида қарийб 900 миллиметр қор ёғиши ва ҳарорат Цельсий бўйича -38 даражагача тушиши мумкин.
Узоқ Шарқда ҳарорат меъёрдан паст бўлиши кутилмоқда: Примореда ҳарорат баъзи жойларда -35 даражагача, Камчатка ва Магаданда эса -32 даражагача пасайиб, ёғингарчилик 450 миллиметрдан ошиб, секундига 30 метргача шамол эсади.
Эҳтимоли юқори сценарийга кўра, Россияда келаётган қиш ўтган йилга қараганда совуқроқ бўлади.
