АҚШ ҳарбийлари бугун, 20 декабрга ўтар кечаси Суриядаги “Ироқ ва Шом ислом давлати”га (ИШИД) тегишли объектларга зарбалар берди. Бу ҳақда АҚШ Мудофаа вазири Пит Ҳегсет ижтимоий тармоқдаги саҳифасида маълум қилди.
Пентагон раҳбарига кўра, мамлакатнинг марказий ҳудудларида жойлашган ИШИДнинг 70 дан ортиқ нишони йўқ қилинган. Ҳужумлар чоғида жангарилар, инфратузилма объектлари ҳамда қурол-яроғ омборлари нишонга олинган. “Al Hadath” телеканали маълумотига кўра, АҚШ базаларидан учирилган ракеталар Дейр-аз-Зор, Ракка ва Ҳомс вилоятлари йўналишига қаратилган, зарбалар қирувчи самолётлар ва зарба берувчи вертолётлар ёрдамида ҳам амалга оширилган.
Пентагонда ушбу амалиёт “Hawkeye Strike” (“Лочин зарбаси”) деб номланган. АҚШ сўнгги ойлар давомида Сурияда шундай ҳужумларни амалга ошириб келмоқда; улар Башар Асад режими ағдарилгач, мамлакатни бошқараётган вақтинчалик Сурия ҳокимияти билан мувофиқлаштирилган ҳолда ўтказилмоқда.
Пит Ҳегсетнинг айтишича, зарбалар 13 декабрь куни Пальмира шаҳрида ИШИД жангариси томонидан Сурия хавфсизлик кучлари ва АҚШ ҳарбийларининг қўшма патрулига уюштирилган ҳужумга жавоб бўлган. Ўшанда икки нафар АҚШ ҳарбийси, америкалик фуқаро бўлган таржимон ва икки нафар суриялик ҳалок бўлган, яна уч америкалик ҳарбий яраланган. Патрулга уюштирилган ҳужумни ёлғиз жангари амалга оширгани, у қарши ўт очиш чоғида йўқ қилингани хабар қилинган.
“Бу уруш эълони эмас, бу қасосдир. Агар сиз дунёнинг қаерида бўлишидан қатъи назар америкаликларга ҳужум қилсангиз, Қўшма Штатлар сизни топади ва шафқатсизларча йўқ қилади”, деган Ҳегсет.
