Ўзбекистон терма жамоаси ва “Пахтакор” ҳужумчиси Игор Сергеев фаолиятини Эрон Пролигасида давом эттириши мумкин. Footballi нашрининг ёзишича, тажрибали форвардга “Истиқлол” ва “Персеполис” клублари жиддий қизиқмоқда.
Манбага кўра, Ўзбекистон терма жамоаси футболчиси Жалолиддин Машарипов Football360 подкастида меҳмон бўлиб, Эрон клубларда ўзбекистонлик футболчилар сони ортишида ўзининг рол катта эканлигини ҳамда ушбу чемпионатга “Пахтакор” ҳужумчиси Игор Сергеев келиши мумкинлигини қўшимча қилган.
Машарипов суҳбат давомида Сергеев билан боғлиқ вазиятга тўхталар, 32 ёшли ҳужумчига “Истиқлол” ҳамда “Персеполис”дан расмий таклиф бўлганини тасдиқлаган. Унинг айтишича, Эроннинг икки номдор клуби форвардни ўз сафига қўшиб олишни истамоқда. Машарипов ҳатто Сергеевга Эрон Пролигасига ўтишни тавсия қилганини ҳам маълум қилган. Шунингдек, у “Истиқлол” бош мураббийи Рикардо Сапинто ундан Сергеев ҳақида маълумот сўраганини ҳам айтиб ўтган.
Маълумот учун, Игор Сергеев жорий мавсум “Пахтакор” сафида 27 та ўйинда майдонга тушиб, 18 та гол ва 2 та голли узатма қайд этди. Унинг клуб билан шартномаси 2025 йил охиригача амал қилади. Transfermarkt портали футболчи қийматини 1 миллион еврога баҳолаган.
