Россия президенти Владимир Путин хорижий давлатлар билан ҳарбий-техник ҳамкорлик масалалари бўйича комиссия йиғилишида Россия Африка мамлакатлари билан бу йўналишда ҳамкорликни кенгайтириш учун имкониятлар мавжудлигини маълум қилди.
Россия раҳбарининг таъкидлашича, Ғарб босимига қарамай, Африка давлатлари Россия билан ўзаро алоқаларни кенгайтиришга тайёр. Бу ҳамкорлик қурол етказиб бериш, илгари етказилган техникага сервис хизмати кўрсатиш, лицензияли ишлаб чиқаришни ташкил этиш ва бошқа йўналишларни ҳам ўз ичига олади.
“Сайёрамизнинг бошқа минтақалари давлатлари, жумладан, Африка қитъаси мамлакатлари билан ҳам ҳарбий-техник ҳамкорликни чуқурлаштириш учун янги истиқболлар очилмоқда”, деган у.
Шу билан бирга, Путин СССР кейинчалик эса Россия узоқ йиллар давомида Африка давлатларига қурол-яроғ ва ҳарбий техника етказиб берганини, шунингдек, мутахассислар ва ҳарбий кадрлар тайёрлаш билан шуғулланганини эслатиб ўтди.
Йиғилишда Путин 2025-йилда Россия 30 дан ортиқ давлатга ҳарбий маҳсулот етказиб берганини, ҳарбий техника экспортидан тушган даромад 15 миллиард доллардан ошганини маълум қилган.
