Кеча, 19 ноябрь куни Исроилнинг Ғазодаги ҳужумлари камида 28 фаластинликнинг ўлимига сабаб бўлди. Бу Исроил ва ҲАМАС ўртасидаги тинчлик битимидан кейинги ҳужумлардан бири ҳисобланади. Бу ҳақда CNN хабар берди.
Қайд этилишича, Исроил мудофаа кучлари (ЦАХАЛ) бу ҳужумларни Жанубий Ғазодаги Хон Юнус шаҳрида “бир нечта террорчилар” Исроил аскарларига ўқ узгани учун амалга оширилганини айтган. ЦАХАЛ хабарига кўра, улар тинчлик битимини бузган, аммо қўшиндан ҳеч ким жароҳат олмаган.
ҲАМАС эса ҳужумларни “жиддий кескинлашув” деб атаган ва ЦАХАЛнинг баёнотини рад этиб, Исроилни “давом этаётган жиноятларини оқлашга” уринишда айблаган. Шундан сўнг, ҲАМАС АҚШни Исроилга “тезкор ва жиддий босим ўтказиб”, тинчлик битимини ҳурмат қилишга чақирган.
Ҳужумлар БМТ Хавфсизлик Кенгаши АҚШ Президентининг тинчликни барқарорлаштириш ва Ғазони тиклаш режаси тарафдори эканини билдирганидан бир неча кун ўтиб содир бўлган.
Ғазодаги ҳужумлар тинчлик битимидан кейин содир бўлган учинчи йирик эскалация ҳисобланади. Олдинги икки эскалацияда (2025 йил 19 ва 28 октябрь) тахминан 150 фаластинлик ва 3 Исроил аскари ҳалок бўлган. Шунга қарамай, тинчлик битими асосан сақланиб қолган.
Ҳалок бўлганларнинг 9 нафари болалар эди, камида 77 киши жароҳатланган. Ғазодаги Ал-Аҳли Баптист шифохонасига яралангани учун келган одамлар видеога олинган. Видеода одамлар жасадлар ёнида ўтиргани кўринмоқда. Бир жасад учун мўлжалланган сумка 3 та бола жасадига тўғри келган.
Энг кўп ўлим кузатилган ҳудуд Ғазонинг шарқидаги Зайтун ҳудуди бўлиб, бу ерда 10 киши, жумладан, бир аёл ва бир бола ҳалок бўлган.
Хон Юнуснинг ғарбидаги яна бир ҳужум эса “UNRWA клубидаги фуқаролар гуруҳини” нишонга олган. UNRWA – БМТнинг Фаластин қочқинларига ёрдам ва ишлаш агентлиги.
