Бугун, 9 март куни футбол бўйича Ўзбекистон аёллар терма жамоаси Австралияда ўтаётган 2026 ОФК Осиё кубоги гуруҳ босқичининг 3-тур учрашувида Бангладешга қарши майдонга тушди. Котрина Калбайте шогирдлари рақибини 4:0 ҳисобида мағлуб этиб, чорак финал босқичига йўлланмани қўлга киритди.
“Б” гуруҳидан жой олган Ўзбекистон терма жамоаси аввалги турларда Хитой ва Шимолий Кореяга йирик ҳисобларда мағлуб бўлган эди. Сўнгги турда Бангладеш устидан қозонилган ғалаба эса жамоага плей-офф босқичига чиқиш имконини берди.
Гуруҳ якунларига кўра, Хитой 9 очко билан биринчи, Шимолий Корея 6 очко билан иккинчи ўринни эгаллади. Бангладеш эса барча ўйинларда мағлуб бўлиб, гуруҳни тарк этди.
Турнир регламентига кўра, гуруҳларда учинчи ўринни эгаллаган жамоалар орасидан энг яхши натижа қайд этганлар плей-офф босқичига йўл олади. Ушбу рейтингда Ўзбекистон 3 очко билан Вьетнамдан кейин иккинчи ўринни эгаллаб, чорак финал йўлланмасини қўлга киритди.
Котрина Калбайте шогирдларининг чорак финалдаги рақиби гуруҳ босқичи якунлангач аниқланади. Агар Ўзбекистон чорак финалдан ўта олса, 2027 йилги Жаҳон чемпионати йўлланмасини тўғридан тўғри қўлга киритади. Мағлубиятга учраган тақдирда ҳам имконият сақланиб қолади – чорак финалда ютқазган жамоалар ўзаро баҳс олиб бориб, мундиал йўлланмаси учун курашади.
