Қашқадарё вилояти Қарши шаҳрида аёл 5 қиздан сўнг 4 эгизак қизалоқни дунёга келтирди. Бу ҳақда ССВ хабар берди.
Қайд этилишича, Китоб туманида яшовчи Жасур Мақаев ва Дилфуза Баҳриддинова оиласида 5 нафар қиздан сўнг тўрт эгизак қизалоқ дунёга келди.
Эгизаклар Республика ихтисослаштирилган она ва бола саломатлиги илмий-амалий тиббиёт марказининг Қашқадарё филиали шифокорлари томонидан муддатидан олдин кесарча кесиш амалиёти орқали туғилган.
Биринчи чақалоқнинг вазни 1 400 грамм, бўйи 37 сантиметр, иккинчисиники 1 450 грамм ва 38 сантиметр, учинчисиники 1 600 грамм ва 40 сантиметр, тўртинчисиники эса 1 400 грамм ва 37 сантиметрни ташкил этади.
Айни пайтда чақалоқлар филиалда халқаро тиббий протоколлар асосида парваришланмоқда.
- Туғилишлар статистикаси
Ўзбекистонда 9 ойлик ҳисобот даврига кўра, ўғил болалар кўпроқ туғилаётгани маълум бўлди. Миллий статистика қўмитаси маълумотларида келтирилишича, 2025 йилнинг январь-сентябрь ойларида ФҲДЁ органларида республика бўйича 664,6 мингта тирик туғилиш ҳолатлари қайд этилган.
Шундан:
- ўғил болалар — 343,6 минг (51,7 фоиз);
- қиз болалар — 321 минг (48,3 фоиз).
- шаҳар жойларда — 319,3 минг (48 фоиз)
- қишлоқ жойларда — 345,3 минг (52 фоиз) туғилиш қайд этилган.
Шунингдек, мазкур даврда ҳар мингта аҳолига 23,5 та туғилиш тўғри келди.
- 2025 йил январь—июнь ойларида жами 10 минг 317 нафар эгизак туғилган. Уларнинг энг кўпи Самарқанд вилоятида (1 минг 253 нафар), энг кам кўрсаткич эса Навоий вилоятида (262 нафар).
Ҳудудлар бўйича энг кўп туғилиш Самарқанд (48 минг 769), Фарғона (45 минг 508) ва Қашқадарё (44 минг 257) вилоятларида қайд этилган. Энг кам кўрсаткич эса Жиззах (17 минг 708), Навоий (11 минг 434) ҳамда Сирдарё (10 минг 23) вилоятларида кузатилган.
