Бугун, 24 февраль куни Эроннинг Исфаҳон вилоятида ҳарбий вертолёт ҳалокатга учраши оқибатида камида тўрт киши ҳалок бўлди. Бу ҳақда “Al Arabiya” хабар берди.
Маълумотларга кўра, Эрон армиясига тегишли вертолёт аҳоли гавжум бўлган ҳудуд – мева-сабзавот бозори яқинига қулаб тушган. Ҳалокат оқибатида вертолёт бортида бўлган икки учувчи, шунингдек, бозорда савдо қилаётган икки нафар фуқаро ҳаётдан кўз юмган.
Вертолёт ерга урилгач, кучли ёнғин келиб чиққан. Воқеа жойига зудлик билан фавқулодда вазиятлар хизмати, ўт ўчирувчилар ва тез тиббий ёрдам бригадалари етиб борган. Қисқа вақт ичида ёнғин бартараф этилган. Расмийлар ҳодиса оқибатида бошқа жабрланганлар бор-йўқлигига аниқлик киритмоқда. Ҳалокат сабаблари ҳозирча расман эълон қилинмаган.
Ўтган ҳафта ҳам Эрон ҳарбий-ҳаво кучларига тегишли АҚШда ишлаб чиқарилган F-4 қирувчи самолёти ғарбий Ҳамадон вилоятида ўқув-машғулот парвози вақтида ҳалокатга учраган эди. Мазкур воқеа оқибатида бир учувчи ҳалок бўлган.
