“Реал Мадрид” Европа футбол ассоциациялари иттифоқи (UEFA) штаб-квартирасига “Негрейра иши” бўйича ҳисобот тақдим этиб, “Барселона”дан 23 та соврин олиб қўйилишини талаб қилмоқда. Бу ҳақда Diario AS нашри хабар берди.
Жорий йилнинг май ойида “Реал Мадрид” президенти Флорентино Перес “Барселона” билан боғлиқ “Негрейра иши” ҳақида фикр билдирган эди. Унинг айтишича, Испания лигаси бошқарув органи унинг клубига нисбатан адолатсиз муносабатда бўлган, “Барселона” эса ҳакамлик қарорларидан фойда кўриб келган. Шу билан бирга, Перес UEFA’га коррупция бўйича ҳисобот тақдим этиш нияти борлигини маълум қилган.
Манбага кўра, “Реал Мадрид” UEFA’дан “Барселона”ни Европа мусобақаларидан четлатишни ҳамда Испания Қироллик футбол федерацияси Техник ҳакамлар қўмитасининг собиқ вице-президенти Энрикес Негрейра фаолият юритган даврда қўлга киритилган барча совринларни бекор қилишни талаб қилмоқда.
Негрейранинг фаолияти давомида “Барселона” 9 марта Испания чемпиони бўлган, 6 марта Қироллик Кубоги ва 8 марта Испания Суперкубогини қўлга киритган.
2023 йилда “Барселона” Энрикес Негрейрага тўланган маблағлар орқали пора беришда айбланган эди. ОАВ маълумотларига кўра, 2001-2018 йиллар оралиғида Негрейра ҳакамлик масалалари бўйича маслаҳат хизматлари учун клубдан тахминан 7 миллион евро олган.
“El País” нашрининг ёзишича, Негрейрага тегишли компания ҳар бир лига ёки Қирол Кубоги ўйини олдидан “Барселона” офисига конвертлар етказиб берган. Уларда ёзма ҳисоботлар ва навбатдаги учрашувни бошқарадиган ҳакам ҳақидаги видеоматериаллар бўлгани айтилмоқда.
