Европа Иттифоқи 20-санкциялар пакети доирасида Қирғизистонга нисбатан санкциялар жорий этиш масаласини муҳокама қилмоқда. Bloomberg маълумотларига кўра, Қирғизистон собиқ Совет Иттифоқи ҳудудида санкцияларни четлаб ўтишда иштирок этгани учун жазоловчи механизм қўлланадиган биринчи давлат бўлиши мумкин.
Гап Қирғизистонга дастгоҳлар ва радиоэлектрон ускуналар етказиб беришни тақиқлаш ҳақида кетмоқда.
Қайд этилишича, Украина уруши бошланганидан сўнг Қирғизистон Россияга санкцияланган Европа товарларини етказиб беришда муҳим транзит марказга айланган.
Европа Иттифоқининг айрим давлатларидан Қирғизистонга экспорт бир неча баробар ошган, айрим ҳолатларда эса 10 000 фоиздан ҳам кўпроқ ўсиш қайд этилган. Шундан сўнг бу маҳсулотлар бир мунча вақт ўтганидан сўнг Россия бозорига етиб борган.
Санкциялар жорий этилиши бўйича якуний қарор ҳали қабул қилинмаган. Муддатлар номаълум. Музокаралар давом этмоқда.
Шунингдек, Европа Иттифоқи Россия банклари ва нефть компанияларига нисбатан қўшимча чекловлар жорий этиши, шунингдек, учинчи давлатлардаги криптовалюта сервислар ва молиявий ташкилотларга ҳам санкциялар қўллаши мумкин.
