Қирғизистоннинг 35 мингга яқин фуқароси Россиядан депортация қилиниш хавфи остида. Бу ҳақда Қирғизистон ташқи ишлар вазири Жеенбек Кулубаев маълум қилди.
Унинг айтишича, ўтган йилнинг ноябрь ойида ушбу рўйхатда 128 мингга яқин қирғизистонлик мавжуд эди. Ўшандан бери кўпчилик ўзини рўйхатда текшириб, қонуний мақомини расмийлаштирган.
“Масъулиятли фуқароларнинг катта қисми ўзини реестрда текшириб, ҳуқуқий мақомини қонунийлаштириш имкониятидан фойдаланган. Бироқ Қирғизистон давлати ва Ташқи ишлар вазирлиги томонидан кўрилган чораларга қарамай, фуқароларнинг бир қисми ҳамон рўйхатда қолмоқда ва улар Россиядан депортация қилиниши мумкин” , деб таъкидлади Кулубаев.
Шу билан бирга, у Россияда ишчи кучи танқислиги юзага келгани сабабли мамлакат миграция сиёсатини юмшатиши мумкинлигини ҳам қўшимча қилган.
Шунингдек, ТИВ раҳбари қирғизистонлик меҳнат муҳожирларининг қайтиши кўплаб лойиҳаларни амалга ошириш учун ишчи кучи талаб қилинадиган Қирғизистоннинг ўзи учун ҳам фойдали эканини қайд этган. У Россияда 90/180 кунлик бўлиш режими амал қилишда давом этаётганини ва қирғизистонлик муҳожирлар мамлакатда бўлишларини ушбу талабларга мослаштиришлари зарурлигини эслатган.
2024-2025-йилларда Россия миграция қонунчилигини кучайтирди. Жумладан, ўтган йилнинг 5 февралидан бошлаб миграция назорати остидаги шахслар реестри амал қила бошлади. Бу реестрга киритилиш ҳуқуқларнинг жиддий чекланишига олиб келади.
Қирғизистон Ташқи ишлар вазирлиги маълумотларига кўра, 2025 йил январь ҳолатига кўра, хорижда 608 мингдан ортиқ Қирғизистон фуқароси бўлиб, улардан 376 907 нафари Россияда миграция рўйхатида туради.
Аввалроқ Россияда бўлиб турган 770 минг нафар ноқонуний мигрант мамлакатни тарк этмаса, мажбурий депортация қилиниши мумкинлиги ҳақида хабар берилганди.
Бундан аввал Россия президенти Владимир Путин 2026–2030-йилларга мўлжалланган давлат миграция сиёсатининг янги концепциясини тасдиқлаганди. Унга кўра, Россияга ишлаш учун келаётган муҳожирлар сонининг ўсиши 2030-йилгача сақланиб қолади. Бу чет эллик ишчиларга бўлган эҳтиёж билан боғлиқ. Янги концепцияда миграция сиёсатининг мақсади, вазифалари ва йўналишлари белгиланган.
Сентябрь ойида Россияда ишламайдиган мигрант оилалар учун пуллик яшаш тартибини жорий этиш таклиф қилинганди.
Россияда 1 сентябрдан бошлаб қўшимча давлат божлари жорий этилди. Булар қаторига рўйхатдан ўтказиш, миграция ҳисоби ва меҳнат фаолиятига рухсат бериш билан боғлиқ тўловлар ҳам киради.
