BBC бош директори Тим Дейви ва BBC News раҳбари Дебора Тернесс АҚШ Президенти Дональд Трампнинг таҳрирланган нутқи билан боғлиқ можаро сабаб истеъфога чиқди. Бу ҳақда “Daily Mail” хабар берди.
“BBC мукаммал эмас ва биз доимо очиқ, шаффоф ва масъулиятли бўлишимиз керак. Бу ягона сабаб бўлмасада, BBC News атрофидаги ҳозирги муҳокамалар қароримга таъсир қилди. BBC умуман олганда яхши ишлади, лекин айрим хатолар бўлди ва бош директор сифатида якуний жавобгарлик менинг зиммамда”, деган Дейви мактубида.
Унга кўра, у бошқарув кенгаши билан истеъфога чиқиш муддатларини келишиб, яқин ойларда лавозимни янги раҳбарга тартибли топширишни таъминлайди.
“Панорама дастурида Трамп ҳақидаги воқеа BBC’га зарар етказадиган даражага етди. Ҳа, хатолар бўлган, аммо BBC News ташкилот сифатида тарафкашлик қилган деган айбловлар ёлғон”, дея қўшимча қилган Дебора Тернесс ҳам.
Тим Дейви 2020 йил сентябрида BBC бош директори бўлган. Бунгача у етти йил давомида корпорациянинг тижорат бўлими – BBC Studios’ни бошқарган. Умумий ҳисобда у BBC’да 20 йил ишлаган.
Дебора Тернесс 2022 йилдан бери BBC News’ни бошқарган. У бутун дунё бўйлаб 500 миллион томошабинга 40 дан ортиқ тилда янгиликлар тайёрлайдиган 5 мингдан ортиқ ходим ишлайдиган жамоага раҳбарлик қилган.
BBC раиси Самир Шах ҳам ушбу воқеаларга ўз муносабатини билдирган.
“Бу BBC учун қайғули кун. Тим сўнгги беш йил давомида ажойиб бош директор бўлди. У BBC’ни қатъият, мақсад ва узоқни кўра билиш билан бошқарди”, деган Шах.
У кенгаш Тимни қўллаб келгани, аммо унга нисбатан кучли босим бўлгани ва бу қарор сабаблари тушунарли эканини қўшимча қилган.
Трамп эса ижтимоий тармоқда қолдирган постида собиқ BBC вакилларини “инсофсизлар” дея атаган.
“Ҳамманинг истеъфога чиқаётганини кўряпсизлар, чунки улар менинг жуда яхши нутқимни бузиб кўрсатди. Бу сайловларга аралашмоқчи бўлган жуда инсофсиз одамлар. Энг ёмони, улар энг яқин иттифоқчиларимиздан деб ҳисобланадиган мамлакатдан!” деган Оқ уй раҳбари.
Истеъфога сабаб бўлган можаро “The Telegraph” газетасининг мақоласидан кейин юзага келган. Газета BBC Panorama дастури “Трамп: Иккинчи имконият?” фильмида Трампнинг нутқи таҳрирлангани, икки алоҳида парча кетма-кет кадр сифатида монтаж қилингани сабабли у тартибсизликларни қўллаб-қувватлагандек кўринганини таъкидлаган. Бу ҳақда BBC’нинг таҳририй стандартлар бўйича собиқ маслаҳатчиси Майкл Прескотт томонидан ёзилган ички хатга таянилган.
Британия Маданият вазири Лиза Ненди ҳам бу вазиятни “жуда жиддий” деб атаган ва BBC’га нисбатан бошқа айбловлар ҳам борлигини, энг оғири – “BBC мураккаб мавзуларни ёритишда тизимли тарафкашликка эга” деган фикр эканини айтган.
Парламент қуйи палатасининг маданият, медиа ва спорт қўмитаси BBC раисидан вазият бўйича изоҳ сўраб расмий мактуб йўллаган.
