Самарқандда пиротехника воситаларини ясаб сотиш билан шуғулланган шахслар ушланди. Бу ҳақда Ички ишлар вазирлиги хабар қилди.
Қайд этилишича, 2008-йилда туғилган шахс харидорга 10 дона қўлбола усулда тайёрланган пиротехника воситаларини 250 минг сўмга ҳамда бир дона ярим литрлик елим идишда ясалган пиротехника воситасини 600 минг сўмга сотаётган вақтда қўлга олинган.
Унинг яшаш хонадони кўздан кечирилганда, 22 дона елим идиш қопқоғидан ясалган ва олти дона елим тасмага ўралган, жами 28 дона пиротехника воситаси ҳамда 200 грамм олтингугурт топилган.
Ушбу фуқаро унинг 2009-йилда туғилган таниши ҳам пиротехника воситаларини тайёрлашини маълум қилган. Унинг уйи текширилганида, 17 дона қўлбола ясалган тақиқланган воситалар ҳамда келгусида ясаш учун мўлжалланган мосламалар ҳужжатлаштириб олинди.
Бошқа бир ҳолатда Самарқанд шаҳрида яшовчи 2009-йилда туғилган ўсмир 5 дона қўлбола пиротехника воситасини икки нафар танишига сотаётган вақтда ашёвий далиллар билан қўлга олинди. Фуқаро танишининг новвойхонасидан эса 31 дона шундай восита ҳамда уларни ясашда фойдаланиладиган модда ва буюмлар борлиги аниқланган.
Ҳозирда аниқланган барча ҳолатлар юзасидан терговга қадар текширув ҳаракатлари олиб борилмоқда.
