Австриядаги Вена амалий санъат музейига чипта сотиб олиб кирган икки эркак Миср собиқ қироличаси Назлига тегишли олмос маржонни ўмарди. Бу ҳақда Al Arabiya хабар берди.
Маълум қилинишича, улар шиша витринани синдирган ва 200 каратли платина ва олмосдан ясалган маржонни олиб, воқеа жойидан узоқлашган. Австрия ОАВ 673 та қимматбаҳо тошдан иборат Van Cleef & Arpels маржонининг қиймати бир неча миллион долларга тенглигини билдирди. Бу Европа музейларида содир бўлаётган йирик ўғриликлар сериясининг навбатдагиси бўлди.
Полициянинг аниқлик киритишича, 27 август куни содир бўлган ўғриликда икки эркак юзини яширмаган ва музейга кириш учун пул тўлаган. Улар кузатув камераларида аниқ кўринган. Улар шиша витринани болға билан синдирган. Шундан сўнг заргарлик буюмини олиб, номаълум томонга қочиб кетган.
Музей ўғрилик бўлганини тасдиқлади. Лекин тергов кетаётгани сабабли қўшимча маълумотлар очиқланмаслигини билдирди. Бу маржон Франциянинг Van Cleef & Arpels дизайнерларига бағишланган кўргазманинг бир қисми эди. Июнь ойидан бери бу ерда 500 га яқин буюм намойиш этилаётган эди.
Кўргазма 27 сентябрь куни якунланиши режалаштирилганди. Музей кўргазма кейинги огоҳлантиришгача ёпиқ бўлишини эълон қилди. Шунга қарамай, ўғрилик содир бўлган бўлим орадан бир неча соат ўтиб қайта очилди.
