Қозоғистон дунёнинг энг рақобатбардош 40 та иқтисодиёти қаторига кирди. Халқаро бошқарувни ривожлантириш институти (IMD) World Competitiveness Ranking 2026 рейтингини эълон қилди.
Рейтинг мамлакатларнинг иқтисодиёт ва бизнесни барқарор ривожлантириш учун шароит яратиш қобилиятини баҳолайди. Қозоғистон унда 70 та давлат орасида 38-ўринни эгаллаган.
Қозоғистон нималарда кучли натижаларни кўрсатди?
Тадқиқотда мамлакатларнинг рақобатбардошлиги тўртта асосий йўналиш бўйича баҳоланади: иқтисодиёт ҳолати, давлат бошқаруви самарадорлиги, бизнес самарадорлиги ва инфратузилма. Рейтингни тузишда статистик кўрсаткичлар ва компания раҳбарлари ўртасида ўтказилган сўров натижаларидан фойдаланилган.
IMD Қозоғистоннинг йигирмата йўналиш бўйича натижаларини алоҳида тақдим этган. Энг юқори натижалар орасида:
- солиқ сиёсати — 9-ўрин;
- халқаро савдо — 19-ўрин;
- меҳнат бозори — 20-ўрин;
- бошқарув амалиётлари — 20-ўрин;
- бизнесдаги қадриятлар ва қарашлар — 20-ўрин;
- бандлик — 26-ўрин;
- институционал муҳит — 29-ўрин;
- меҳнат унумдорлиги ва самарадорлик — 32-ўрин;
- ички иқтисодиёти 33-ўринни қайд этган.
Аҳолиси 20 миллиондан ортиқ бўлган давлатлар орасида Қозоғистон 15-ўринни эгаллади. Европа, Яқин Шарқ ва Африка мамлакатлари гуруҳида республика 25-ўринни қайд этган. Сингапур, Гонконг, Швейцария, Тайван, БАА, Дания, Ирландия, Нидерландия, Швеция ва АҚШ топ ўнталикдан ўрин олган.
