Қозоғистоннинг Манғистов туманидаги кучли ёғингарчиликлар отларнинг нобуд бўлишига сабаб бўлди. Бу ҳақда “Lada.kz” хабар берди.
Ёмғирлардан кейин ҳайвонлар шўрхок ерларга ботиб қолган ва уларнинг кўпчилиги ҳалок бўлган. Маҳаллий ҳокимият бунга муносабат билдирган.
Маҳаллий аҳоли чорва йўқотилгани ҳақида ижтимоий тармоқларда ёзиб қолдирган. Уларнинг айтишича, ҳар бир хонадон бир нечтадан ўнтагача чорва йўқотган.
“Қаттиқ ёмғирлардан сўнг Манғистовда, Оқшимирау қишлоғи атрофида чорва сув оқими билан оқиб кетиб, шўрхок ҳудудларга тушиб қолган. Кўплаб отлар шўр лойга ботиб нобуд бўлди, яна бир қисми эса чиқиб кета олмаяпти. Агар Фавқулодда вазиятлар вазирлиги ва маҳаллий ҳокимият ёрдам бермаса, вазият янада оғирлашиши мумкин”, деган қишлоқ аҳолиси.
Улар муаммога қонунчилар ва ҳайвонларни ҳимоя қилувчи ташкилотлар эътибор қаратишини сўраган.
Кейинчалик маҳаллий ҳокимлик нашрга маълум қилишича, Манғистов вилоятида 14–15 апрель кунлари Саётес қишлоғида кузатилган ноқулай об-ҳаво оқибатлари бартараф этилмоқда.
Маълум қилинишича, Саётес ва 7-темирйўл бекати оралиғида (туман марказидан 120–150 км узоқликда) темирйўл ёқаси бўйлаб тўпланган қишлоқ хўжалиги ҳайвонларининг нобуд бўлиш ҳолатлари аниқланган.
Вазиятни баҳолаш учун 16–17 апрель кунлари давлат органлари вакиллари иштирокида махсус комиссия тузилган.
Дастлабки маълумотларга кўра, юздан ортиқ от топилган. Ҳозирда маҳаллий ижро органлари нобуд бўлган чорва сонини аниқлаштирмоқда, чунки эгалари ҳали тўлиқ ҳисоб-китоб олиб бора олмаган.
Таъкидланишича, чорва нобуд бўлишига кучли шамол ва жала ёмғирлар каби кескин об-ҳаво шароитлари сабаб бўлган. Йўлдан адашган ҳайвонлар бориш қийин бўлган ҳудудларга тушиб қолиб, ҳаддан ташқари нам ерларда ҳалок бўлган. Айрим подалар аҳоли яшаш жойларидан 60–80 км узоқликда нобуд бўлган бўлиши мумкин.
Йўқолган чорвани қидириш учун дронлар ёрдамида ҳаводан кузатув йўлга қўйилган. Вилоят ҳокими ўринбосари раҳбарлигида тезкор штаб йиғилиши ўтказилиб, унинг якунларига кўра нефть-газ корхоналарига қўшимча техник ёрдам кўрсатиш топширилган.
Ҳозирда вилоят қишлоқ хўжалиги ва ер муносабатлари бошқармаси раҳбари Манғистов туманида бўлиб, аҳоли билан учрашувлар ўтказмоқда ва зарур ишларни мувофиқлаштирмоқда.
“Ҳодиса оқибатларини бартараф этиш учун барча куч ва воситалар сафарбар қилинган: йирик корхоналар техникаси, фавқулодда вазиятлар хизматлари ва маҳаллий ижро органлари жалб этилган. Сувни чиқариш ва тиклаш ишлари жадаллик билан давом этмоқда. Вазият алоҳида назоратга олинган. Чорва эгалари билан ишлаш олиб борилмоқда, замонавий мониторинг воситалари ва махсус техника қўлланилмоқда”, дейилади Манғистов туман ҳокимлиги хабарида.
