Қозоғистоннинг Туркистон вилоятида автомобиль кўприги қулаб тушди. Воқеа жойига қутқарувчилар ва полиция ходимлари жалб қилинди. Бу ҳақда Tengrinews хабар берди.
Ҳодиса Қўшқората қишлоқ округи ҳудудида содир бўлган. Келес дарёси устида қурилган кўприк қулаб тушган оқибатда транспорт ҳаракати тўлиқ тўхтатилган.
Аҳоли ва ҳайдовчилар хавфсизлигини таъминлаш мақсадида транспорт альтернатив маршрут бўйлаб, Алпомиш ва Биртилек қишлоқлари орқали ўтказилмоқда. Ушбу йўлнинг узунлиги 10-15 километрни ташкил этади. Йўл белгилари ўрнатилиб, тегишли хизматлар томонидан назорат кучайтирилган. Воқеа жойида Фавқулодда вазиятлар бошқармаси, полиция ва маҳаллий ижро органлари вакиллари ишламоқда.
“Вазият барқарор, тегишли мутахассислар кўприкнинг техник ҳолатини текшириб, хулоса беради”, дейилади хабарда.
Маълум қилинишича, вилоят аҳамиятидаги QХ-20 автомобиль йўли бўйида жойлашган кўприкда дастлаб ёриқ пайдо бўлган.
“Хавф кўприкнинг узоқ муддатли фойдаланилиши ва таянч устунлари тубининг ювилиши туфайли юзага келган”, деди ҳокимлик.
Кўприк Туркистон вилояти Йўловчи транспорти ва автомобиль йўллари бошқармаси балансида туради. Ҳокимият ҳайдовчилардан вақтинчалик ноқулайликларни қабул қилиб, айланма йўлдан фойдаланишни сўрамоқда.
