2025 йил якунларига кўра, АҚШни тарк этганлар сони мамлакатга кўчиб келганларга қараганда 150 минг кишига кўп бўлди, деб хабар берди The Wall Street Journal (WSJ) нашри.
Бундай кўрсаткич сўнгги марта «Буюк депрессия» (1929–1939 йиллар) даврида кузатилган эди.
АҚШ маъмурияти аҳолининг четга оқимини ноқонуний миграцияга қарши кураш чоралари билан изоҳламоқда. Бироқ, статистик маълумотлар кўрсатишича, мамлакатни нафақат мигрантлар, балки хавфсизроқ давлатларда яшашни афзал кўраётган АҚШ фуқароларининг ўзлари ҳам фаол равишда тарк этмоқда.
Хусусан, Европа Иттифоқининг деярли барча давлатларида яшаш ва ишлаш учун кўчиб келган америкаликлар сони рекорд даражага етган. Мамлакатдан чиқиб кетган фуқароларнинг сўзларига кўра, «янги Америка орзуси — энди АҚШда яшамасликдан иборат».
Мутахассисларнинг фикрича, бу тенденция иқтисодий нобарқарорлик, ички сиёсий зиддиятлар ва хавфсизлик даражасининг пасайиши билан боғлиқ бўлиши мумкин.
