Андижон вилояти Балиқчи туманида 9 ёшли бола юк машинаси уриб юборишидан вафот этди. Бу ҳақда вилоят ЙҲХБ матбуот хизмати хабар берди.
Маълум қилинишича, ҳодиса 24 февраль куни соат 15:56 ларда “Эски Марказ” МФЙ ҳудудидан ўтган автомобиль йўлида содир бўлган. 2002-йилда туғилган ҳайдовчи “ЗИЛ 130” русумли юк транспорт воситасини бошқариб кетаётганида тартибга солинган чорраҳадаги пиёдалар ўтиш жойидан югуриб чиққан 2017-йилда туғилган Ҳ.М.ни уриб юборган. Сўнг рул бошқарувини йўқотиб, чорраҳада тўхтаб турган Cobalt билан тўқнашган. Ҳодиса акс этган видео ижтимоий тармоқларда ҳам тарқалди.
ЙТҲ оқибатида тан жароҳатлари олган вояга етмаган пиёда Ҳ.М. кўрсатилган тиббий муолажаларига қарамасдан шифохонада вафот этган.
Мазкур ҳолат юзасидан Балиқчи тумани ИИБ ҳузуридаги Тергов бўлинмаси ходимлари томонидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлишига сабаб бўлиши) билан жиноят иши қўзғатилиб, ҳозирда тергов ҳаракатлари олиб борилмоқда.
Ушбу модда билан айбдор деб топилган шахслар 3 йилгача муайян ҳуқуқдан маҳрум қилиб, БҲМнинг 50 бараваригача миқдорда жарима ёки 3 йилгача озодликни чеклаш ёхуд 3 йилгача озодликдан маҳрум қилиш билан жазоланиши мумкин.
