Тошкент шаҳрида яширин усулда тарқатиш учун тайёрланган 1,7 килограммдан ортиқ синтетик гиёҳвандлик воситалари мусодара қилинди. Бу ҳақда Тошкент шаҳар Ички ишлар бош бошқармаси хабар берди.
Қайд этилишича, ҳолат “Уч қаҳрамон” йўл-патруль хизмати масканида аниқланган. ЙПХ инспекторлари Spark русумли автомобилни тўхтатиб текширганида, йўловчилардан бири шубҳали ҳаракатлар қилган ва кўздан кечириш вақтида қочишга уринган. У ходимлар томонидан ушланган.
Фуқаронинг ёнидан яширин усулда тарқатиш учун қадоқланган синтетик гиёҳвандлик воситалари топилган. Шундан сўнг, Юнусобод тумани ички ишлар органлари ҳамда Давлат хавфсизлик хизмати ходимлари гумонланувчининг хонадонини холислар иштирокида кўздан кечирган.
Натижада хонадондан турли хил синтетик гиёҳвандлик воситалари, уларни қадоқлаш учун ишлатиладиган пакетлар, респиратор ва тарозилар ашёвий далил сифатида олинган. Ўтказилган тезкор тадбир давомида жами 1 килограмм 500 грамм мефедрон, 120 грамм “Alfa-PVP” ва 100 грамм “спайс” мусодара қилинган.
Маълум бўлишича, гумонланувчи интернет орқали иш излаб, гиёҳвандлик воситаларини тарқатишга рози бўлган. У терговга оид видеода мефедрон, “скорост” ва “спайс” деб аталадиган моддаларни тарқатиш учун тайёрлаб қўйганини айтган. Шунингдек, ноқонуний фаолият учун жиноий жавобгарлик борлигини билганини билдирган.
Билдирилишича, мазкур ҳолат юзасидан Жиноят кодексининг 273-моддаси (Гиёҳвандлик воситаларини, психотроп моддаларни ёки уларнинг аналогларини ўтказиш мақсадини кўзлаб қонунга хилоф равишда тайёрлаш, қайта ишлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) билан жиноят иши қўзғатилиб, гумонланувчига нисбатан қамоққа олиш тарзидаги эҳтиёт чораси танланган.
