Тошкентда Uzum Market номидан фойдаланиб фуқароларга сохта акция ютуғи ҳақида хабар бериб, уларнинг маблағларини ўзлаштирган ноқонуний Call марказ — “кибербункер” фаолияти фош этилди.
Дастлабки терговга қадар бўлган маълумотларга кўра, гуруҳ 110 нафардан ортиқ фуқаронинг 300 млн сўмдан зиёд маблағини ноқонуний йўл билан ўзлаштирган.
Тошкент вилояти ИИББ Ахборот технологиялари соҳасидаги жиноятларга қарши курашиш бошқармаси ходимлари томонидан ўтказилган тезкор-қидирув тадбири давомида Шайхонтоҳур туманидаги кўп қаватли уйнинг тўртинчи қаватида ташкил этилган Call марказ аниқланган.
Аниқланишича, Фарғона вилоятида яшовчи, 2005 йилда туғилган Д.Х. ва унинг шериклари фуқароларга қўнғироқ қилиб, уларни гўёки Uzum Market савдо иловасининг компания аксияси ғолиби бўлгани ҳақида алдаб келган.
Фирибгарлар совға учун тўловни ёки фуқарога ажратилган кредит ва микроқарз лимитини вақтинча Alvion, Меgа Теcno ва Меga Shop ЯТТларига ўтказишни сўраган. Эвазига акция доирасида ютилган маиший техника етказиб берилишини ваъда қилган.
Гуруҳ аъзолари бундан ташқари савдо платформасида ўзларини гўёки маҳсулот етказиб берувчи сифатида рўйхатдан ўтказган. Харидорлар маҳсулотни талаб қилган ёки норозилик билдирган ҳолатларда эса уларга атайлаб жуда арзон, сифатсиз ёки буюртмага мос келмайдиган маҳсулотларни юборган. Шундан сўнг кўп ҳолларда улар билан алоқа узилган.
Текширув давомида “кибербункер”да 5 нафар оператор фаолият юритгани аниқланган. Улар ижтимоий тармоқлардаги сохта онлайн дўконлар номидан юзлаб фуқароларга қўнғироқлар қилган.
Тезкор тадбир вақтида 10 та компьютер жамланмаси, 8 та мобил телефон, 150 варақдан иборат шахсий маълумотлар ва Uzum Nasiya иловасидан ажратилган лимитлар жадваллари, шунингдек, 2 та дафтар ашёвий далил сифатида расмийлаштириб олинган.
Ҳозирда гуруҳ аъзолари республиканинг бошқа ҳудудларидаги шу каби фирибгарлик ҳолатларига алоқадорлиги, шунингдек, фуқароларга етказилган моддий зарар миқдорини аниқлаш ва уни қоплаш бўйича тергов ҳамда тезкор-суриштирув ҳаракатлари олиб борилмоқда.
Тошкент вилояти ИИББ Alvion, Меgа Теcnо ва Меgа Shop ЯТТлари фаолияти билан боғлиқ фирибгарликдан жабрланган фуқароларни +998 71 762-21-35, +998 71 762-20-24 ёки +998 71 762-20-25 рақамларига, шунингдек, энг яқин ички ишлар органига мурожаат қилишга чақирди.
