Ўзбекистон Президенти Шавкат Мирзиёевнинг таклифига биноан, жорий йилнинг 29 октябрь куни мамлакатга келган Словакия Президенти Петер Пеллегринининг амалий ташрифи якунланди. Бу ҳақда ЎзА хабар берди.
Петер Пеллегринини Самарқанд халқаро аэропортида Бош вазирнинг биринчи ўринбосари Очилбой Раматов ва бошқа расмийлар кузатиб қўйган.
Самарқандда амалга оширилган ташриф дастурига мувофиқ, 30 октябрь куни Ўзбекистон Президенти Шавкат Мирзиёев ва Словакия Президенти Петер Пеллегрини музокара ўтказди.
Учрашувда Ўзбекистон билан Словакия ўртасидаги стратегик шериклик ва кўп қиррали ҳамкорлик муносабатларини янада кенгайтиришнинг долзарб жиҳатлари кўриб чиқилган.
Словакия етакчиси нуфузли меҳмонлар қаторида UNESCO Бош конференциясининг 43-сессияси очилиш маросимида иштирок этган. Шунингдек, ташкилот Бош конференцияси сессиясининг 31 октябрь кунги навбатдаги ялпи мажлисида қатнашиб, сўзга чиқди.
Петер Пеллегрини ташриф давомида Самарқанддаги тарихий-маданий ёдгорликлар билан танишди ҳамда Ўзбекистон ва Словакия ижодий жамоалари иштирокидаги концерт дастурини томоша қилди.
