Хитойда сунъий интеллект кўмагида яратилган биринчи инновацион дори Тиббий буюмлар миллий бошқармаси (NМPА) томонидан тасдиқланди. Янги дори моддаси топилганидан тортиб, одамларда синаб кўрилгунича бор-йўғи уч ярим йил вақт кетди. Бу ҳақда Вестлейк университетига таяниб Global Times хабар берди.
Мпросевир деб номланган бу препарат Вестлейк университети, Вестлейк лабораторияси ва Westlake Pharmaceuticals компанияси томонидан биргаликда ишлаб чиқилди. Бошқарма уни катталардаги енгил ва ўртача оғирликдаги COVID-19 инфекциясини даволаш учун сотишга шартли рухсат берди.
Sinxua ахборот агентлиги хабарига кўра, дори воситаси илгари Хитойда ёки хорижда сотувга чиқмаган янги препаратдир. У бутунлай янги кимёвий тузилиш, янгича таъсир механизми ва аниқ клиник қийматга эга бўлган мутлақо янги ишланмадир.
Дори “ДНК билан кодланган кутубхона технологияси” (DEL) асосида муваффақиятли тасдиқланган дунёдаги биринчи кичик молекулали инновацион препарат бўлди. Тиде News’га кўра, бу DEL технологияси концепсияси таклиф қилинганидан 34 йил ўтиб эришилган тарихий ютуқдир.
Олимлар бошиданоқ сунъий интеллект ва DEL технологиясини бирга қўллади. Сунъий интеллект хато бирикмаларни чиқариб ташлаб, дори бўлиш эҳтимоли юқори моддаларни саралаб берди. Мпросевиръни топиш учун 49 миллиардта бирикмали улкан базадан фойдаланилди. Дастлаб шулар орасидан 100 дан ортиқ мос келадиган модда ажратиб олинди.
Одатда 100 дан ортиқ моддани алоҳида синаб кўриш учун жуда кўп вақт ва ресурс кетарди. Лекин сунъий интеллект бу рўйхатни атиги бир неча кунда 9 тагача қисқартирди. Ушбу тўққизта молекуланинг фаоллик тести шуни кўрсатдики, улардан олтитаси юқори фаоллик намоён этган. Бу эса тахмин қилинган аниқлик даражаси жуда юқорилигини кўрсатди.
Заҳарлилик, моддалар алмашинуви ва бошқа синовлардан сўнг олимлар охир-оқибат WLU6937 молекуласини энг мақбул модда сифатида танлади. Тадқиқотчилар гуруҳининг таъкидлашича, Мпросевир дори воситаларини сунъий интеллект ёрдамида яратиш ҳозирги кунда жуда самарали ва амалга ошириб бўладиган жараён эканини исботлади.
Кейинги икки йил давомида жамоа ушбу молекула устида тўлиқ такомиллаштириш ишларини олиб борди. Унинг фаоллиги оширилди, дори сифатлари яхшиланди, токциклиги камайтирилди. Шунингдек, трубкадаги ва сичқонлардаги тажрибалардан тортиб клиник синовларгача бўлган босқичлар босиб ўтилди. Сунъий интеллект бу босқичда ҳам муҳим рол ўйнади.
