Илон Маскнинг SpaceX компанияси томонидан бошқариладиган Starlink сунъий йўлдош интернет хизмати Вьетнамда буюртмалар қабул қилишни бошлади. Бу ҳақда Reuters хабар берди.
Маълум қилинишича, Вьетнам аҳолиси Starlink’нинг расмий веб-сайти орқали уй хўжаликлари учун мўлжалланган интернет хизматига буюртма бериши мумкин. Тариф режаси ойига 1,13 млн донгдан (тахминан 43 доллар) бошланади. Хизматдан фойдаланиш учун зарур қурилмалар нархи эса 8,66 млн донгни ташкил қилади.
Корпоратив мижозлар учун энг арзон ойлик тариф 1,48 млн донг этиб белгиланган.
Starlink қамров харитасига кўра, Вьетнам Индонезия, Малайзия, Филиппин, Сингапур ва Шарқий Тимордан кейин Starlink хизматлари мавжуд бўлган Жануби-Шарқий Осиёдаги олтинчи бозорга айланди.
Вьетнам ҳукумати 2025 йил март ойида SpaceX компаниясига Starlink хизматини мамлакатда синов тариқасида ишга туширишга рухсат берган эди. Шунингдек, хизмат учун хорижий мулкчиликка оид чекловлардан воз кечилган.
Синов даври 2030 йил охиригача давом этади. Ушбу давр мобайнида Starlink абонентлари сони 600 минг нафар билан чекланган.
Мамлакатда хизмат SpaceX’нинг маҳаллий бўлинмаси — Starlink Services Vietnam томонидан бошқарилади. Компания 2025 йил сентябрь ойида 30 млрд донг (тахминан 1,1 млн доллар) устав капитали билан ташкил этилган.
