Ҳозирда АҚШда бўлиб турган 1,6 миллионга яқин ноқонуний муҳожирлар депортация қилиниши кутилмоқда. Бу ҳақда Иммиграция ва божхона назорати хизмати директори вазифасини бажарувчи Тодд Лайонс маълум қилди.
Fox News телеканали маълумотларига кўра, бундай рақамларни у пайшанба куни АҚШ Конгресси Сенатининг ички хавфсизлик ва ҳукумат ишлари бўйича қўмитаси аъзолари олдида сўзлаган нутқида эълон қилган. Лайонснинг қўшимча қилишича, рўйхатдагиларнинг тахминан 800 минг нафари судланган.
Аввалроқ АҚШ ички хавфсизлик вазири Кристи Ноэм 2025 йилда 3 миллион муҳожир мамлакатни тарк этганини, улардан 800 мингга яқини мажбурий равишда депортация қилинганини айтган эди.
