Ўзбекистон президенти Шавкат Мирзиёев 11—12 декабрь кунлари амалий ташриф билан Туркманистонда бўлади. Бу ҳақда Президент матбуот хизмати хабар берди.
Давлат раҳбари туркман халқининг миллий етакчиси, Туркманистон Халқ Маслаҳати раиси Гурбангули Бердимуҳамедовнинг таклифига биноан Ашхобод шаҳрига боради. Ташриф дастурига мувофиқ, Шавкат Мирзиёев Туркманистоннинг доимий бетарафлиги эълон қилинганининг 30 йиллиги, Халқаро бетарафлик куни ҳамда 2025 йил “Халқаро тинчлик ва ишонч йили” деб эълон қилинганига бағишланган халқаро форумда иштирок этиши кўзда тутилган.
Тадбирда хорижий давлатлар ва ҳукуматлар, халқаро ва минтақавий ташкилотлар раҳбарлари ҳам иштирок этади.
Ўзбекистон президенти форумнинг “Тинчлик ва ишонч: барқарор келажак йўлидаги мақсадлар муштараклиги” мавзусида ялпи сессиясида нутқ сўзлайди.
Саммит доирасида Ўзбекистон раҳбари қатор икки томонлама учрашувлар ҳам ўтказади.
