Испаниянинг Барселона шаҳри яқинида иккита поезд рельсдан чиқиб кетди. Алоҳида ҳодисалардан бирида бир киши, машинист ҳалок бўлди ва камида 37 киши жароҳатланди. Бу ҳақда BBC хабар берди.
Бу фожиалар пойтахт Мадридда яқинида рўй берган мудҳиш поездлар тўқнашувидан атиги икки кун ўтиб содир бўлди. Маълум қилинишича, 20 январь куни кечқурун Родалиэс тармоғига тегишли поезд Гелида ва Сант-Садурни станциялари оралиғида йўл четидаги таянч деворга бориб урилган. Каталония ёнғин хавфсизлиги инспектори Клауди Голлардонинг сўзларига кўра, кучли бўрон оқибатида девор қулаб, темир йўл изига тушиб қолган. Тўқнашув оқибатида:
- поезд машинисти ҳалок бўлган;
- камида 37 киши жароҳатланган (шундан 5 нафари оғир, 6 нафари ўртача ва 26 нафари енгил ҳолатда);
- жароҳатланганлар Моисес Брогги, Беллвитге ва Вила Франcа шифохоналарига етказилган.
Воқеа жойига 11 та тез ёрдам машинаси ва 35 та ўт ўчириш гуруҳи сафарбар этилган. Поезд ичида қисилиб қолган бир йўловчи қутқариб олинди. Ҳудудда бошқа қурбонлар йўқлигини аниқлаш учун қўшимча қидирув ишлари олиб борилмоқда.
Яна бир авария
Худди шу куни Барселона шимоли-шарқидаги Бланес ва Масанет-Массанес йўналишида яна бир поезд рельсдан чиқиб кетган. Испания темир йўл оператори Адиф берган баёнотга кўра, бўрон кўчириб юборган тош поезд ўқига келиб урилган. Тасодиф туфайли ушбу ҳодисада ҳеч ким жабрланмаган.
Транспорт инқирози
Кетма-кет содир бўлган авариялар сабабли Родалиэс тармоғида ҳаракат бутунлай тўхтатилди. Эл Паис нашрининг ёзишича, 21 январь куни эрталаб 400 мингга яқин йўловчи поезд хизматидан фойдалана олмайди. Ҳозирда барча йўлларда хавфсизлик текширувлари ўтказилмоқда.
