Пекин шаҳрида ўтказилган ярим марафонда робот-гуманоид одамлар ва роботлар иштирок этган югуриш мусобақасида ғолибликни қўлга киритди. У 21 километр масофани 50 дақиқа 26 сонияда босиб ўтди.
Lightнинг (Чақмоқ) номли робот Honor компанияси томонидан яратилган бўлиб, у илгари угандалик югурувчи Жейкоб Киплимо ўрнатган жаҳон рекордини (57 дақиқа 20 сония) янгилади. Шунингдек, робот Пекиндаги шу ярим марафонда инсонлар ўртасида ғолиб бўлган спортчидан 17 дақиқага тезроқ маррага етиб келган.
19 апрель куни бўлиб ўтган югуришда юздан ортиқ робот ва қарийб 12 минг киши қатнашган. Қайд этилишича, тўқнашувларнинг олдини олиш мақсадида роботлар ва югурувчилар алоҳида, параллел йўлакларда ҳаракатланган.
Мусобақада Honor компанияси роботлари барча учта совринли ўринни эгаллади. Бироқ айрим қурилмалар муаммоларга дуч келган: масалан, роботлардан бири финишга яқинлашганда йиқилиб тушган ва йўлакдан олиб чиқиб кетилган.
Роботлар ва инсонлар иштирокидаги илк ярим марафон Пекинда ўтган йили ташкил этилган эди. Ўшанда роботлар орасидаги энг яхши натижа 2 соат 40 дақиқани ташкил этган, инсонлар ўртасидаги ғолиб эса бу натижадан икки баравар тезроқ маррага етиб келган.
