Ғазо секторида Исроил армияси томонидан 2025 йил октябрда кучга кирган ўт очишни тўхтатиш режимининг бузилиши оқибатида камида 603 нафар фаластинлик ҳалок бўлган, яна 1618 нафари эса жароҳатланган. Бу ҳақда Ғазо Соғлиқни сақлаш вазирлиги ўзининг Telegram каналида эълон қилди.
Вазирлик маълумотларига кўра, сўнгги бир кеча-кундуз ичида секторда 2 киши вафот этган, 11 киши эса тиббий ёрдам сўраб мурожаат қилган. 2023 йил октябридан бери Ғазодаги можаронинг авж олиши оқибатида ҳалок бўлган фаластинликларнинг умумий сони 72 063 кишига етган, 171 мингдан ортиқ киши жароҳат олган.
10 февраль куни Фаластин сектори раҳбарияти ўт очишни тўхтатиш келишувининг тўрт ойи мобайнида Исроил томонидан келишувлар 1600 марта бузилганини қайд этди.
Яқин Шарқдаги вазият 2023 йил 7 октябрда ҲАМАС ҳаракати аъзоларининг Ғазо секторидан Исроил ҳудудига кириб, чегарадош аҳоли пунктлари фуқароларни ўлдириши ва гаровга олиши ортидан кескин тус олди. Бунга жавобан Исроил ҲАМАСнинг ҳарбий ва сиёсий тузилмаларини йўқ қилиш ҳамда барча асирларни озод этиш мақсадида анклавда ҳарбий операция бошлади.
