Чехиянинг Skoda Group компанияси Ўзбекистонда темир йўл транспортини йиғиш бўйича қўшма корхона ташкил этишни режалаштирмоқда. Бу ҳақда компания матбуот хизмати хабар берди.
Шавкат Мирзиёев 24 октябрь куни Бельгияга расмий ташрифи доирасида Европанинг етакчи компания раҳбарлари билан давра суҳбати ўтказганди. Унда иштирок этган Skoda Group бош директори Петр Новотний Марказий Осиё бозорини истиқболли деб баҳолаб, Европа комиссияси ва Европа инвестиция банки кўмагида қўшма корхона ташкил этиш орқали Ўзбекистон бозорига кириш бўйича ўз стратегик режасини тақдим этди.
Қўшма корхона учта асосий йўналишда фаолият олиб боради:
- темир йўл транспорт воситаларини маҳаллий шароитда йиғиш;
- транспорт воситаларининг бутун хизмат муддати давомида техник хизмат кўрсатиш ва таъмирлаш;
- маҳаллий мутахассисларни ўқитиш ва малакасини ошириш учун Skoda академиясини ташкил этиш.
“Бу уч соҳанинг ҳар бири Кенгайтирилган шериклик ва ҳамкорлик тўғрисидаги янги битимни ҳамда Европанинг Global Gateway стратегиясини амалга ошириш йўлидаги аниқ қадамдир”, деган Петр Новотний.
Ташриф давомида Skoda Group вакиллари ва транспорт вазири Илҳом Маҳкамов икки томонлама музокаралар ўтказиб, темир йўл ва шаҳар транспорти соҳасидаги ҳамкорлик режаларини ҳам муҳокама қилган. Президент Skoda Group компаниясининг Ўзбекистон транспорт соҳасини ривожлантиришга, айниқса, Европа технологиялари ва ноу-хауларини жорий этишга қўшаётган ҳиссасини юқори баҳолаган. У компаниянинг Ўзбекистон бозорида узоқ муддатли фаолиятини қўллаб-қувватлашини билдирган.
2023 йилнинг октябрида “Ўзбекистон темир йўллари” ва Skoda Group компаниялари ўртасида 320 миллион евролик 30 та электропоезд етказиб бериш бўйича шартнома имзоланганди. Имзоланган шартнома Чехия компаниясининг Ўзбекистонда ютган энг йирик шартномаси бўлганди.
