Россияда боксчи Дмитрий Биволнинг этник адоват қўзғатишда айбланган собиқ рафиқаси Екатерина Биволга нисбатан суд ҳукми чиқарилди. Бу ҳақда Санкт-Петербург судларининг матбуот хизмати хабар берди.
Маълум қилинишича, Екатерина Бивол маъмурий жавобгарликка тортилган. Суд қарорига кўра, у 60 соат жамоат ишларига ҳукм қилинган.
Суд баёнотида қайд этилишича, лингвистик экспертиза натижаларига кўра, Биволнинг баёнотларида миллати, тили ва келиб чиқиши бўйича бирлашган ижтимоий гуруҳ – қозоқлар ва қирғизларга нисбатан салбий баҳо мавжуд бўлган.
“Салбий баҳо ҳақоратли ва қўпол сўзлар орқали ифодаланган. Видеода айтилган фикрлар табиий (генетик) хусусиятларга асосланиб, бир гуруҳ одамларнинг бошқасидан устунлигини таъкидлайди”, дейилади суд хулосасида.
Эслатиб ўтамиз, аввалроқ Қозоғистон Ички ишлар вазирлиги Дмитрий Биволнинг собиқ рафиқасини мамлакат ҳудудига экстрадиция қилиш масаласини кўриб чиқаётгани ҳақида хабар берган эди. 2025 йилнинг октябрь ойида Қозоғистон ИИВ Екатерина Биволга нисбатан жиноий иш қўзғатилганини тасдиқлаган. Шундан сўнг у қидирувга берилган эди.
Бундан ташқари, Екатерина Бивол Қирғизистонда ҳам қидирувда бўлган. У ерда унга нисбатан Жиноят кодексининг 330-моддаси (ирқий, этник, миллий ёки минтақалараро адоватни (низони) қўзғатиш) бўйича жиноий иш очилган.
Оммавий ахборот воситалари хабарига кўра, терговга Екатерина Биволнинг автомобиль бошқараётган пайтда қирғизлар ва бошқа миллат вакиллари ҳақида ҳақоратли сўзлар ишлатгани акс этган видео сабаб бўлган.
